Şandeyek ji Ewlehiya Hundir a Kantona Cizîrê bi armanca plansaziya vegera koçberên Efrînê û nîqaşkirina koçberên Heleb û Reqayê serdana Efrîn, Helep û Reqayê kir. Di hevdîtinên bi rayedarên Hikûmeta Demkî yên Reqa û Helebê re hatin kirin de biryara lezkirina vegeran hate dayîn.
Di çarçoveya Peymana 29ê Çile de ji bo vegera koçberên Efrîn, Heleb û Reqayê hevdîtinên di navbera rayedarên Hikûmeta Demkî yên Efrîn, Reqa û Helebê de berdewam dikin. Ji bo plansaziya vegera koçberan şandeyeke Hêzên Ewlekariya Hundirîn a Kantona Cizîrê serdana Efrîn, Heleb û Reqayê kir. Di hevdîtinan de planeke guncaw ji bo vegera koçberên Efrîn hate gotûbêjkirin.
Dê çeteyên Tirkiyê ji Efrînê derkevin
Li gorî plansaziyê pêşiyê kesên di dema dagirkeriya Tirk û çeteyên wê de hatine Efrînê vegerin bajarên xwe, mal, erd û dikanan qasp kirîn li xwediyên wan ên resen bên vegerandin. Piştî van koman Efrîn terikand dê di destpêkê karwaneke koçberan vegere Efrînê. Lîsteya nav, hejmar û agahiyên malabatên dê vegerin Efrînê ji hêla Komeleya Civakî ya Efrînê û Meclisa Koçberên Efrîn û Şehbayê ve hatiye amadekirin. Lîsteya 400 malbatên dê wekî karwanê yekemîn vegerin ji rêveberiya Hikûmeta Demkî ya Helebê û rayedarên girêdayî wê yên li Efrînê dimînin re hate şandin.
Lijneyê rewşa Şêxmeqsûd û Eşrefiyê jî nîqaş kir
Şandeyeke Hêzên Ewlekariya Hundirîn a Kantona Cizîrê piştî evrînê derbasî Helebê bû serdana taxên Şexmeqsûd û Eşrefiyê kir. Her wiha di çarçoveya serdanê de mijara vegera xelkê her du taxan bo malên xwe hate gotûbêjkirin. Biryar hate girtin ku hevdîtinên li ser mijarê bên berdewam kirin.
Li Reqayê rewşa Girê Spî hate nîqaşkirin
Di çarçoveya hewldanên berdewam ên vegerandina koçberan de şande derbasî Rewayê bû û bi Parêzgarê Reqayê re hevdîtin pêk anî. Di civînê de rewşa ewlehî û xizmetguzarî ya Reqayê, her wiha rewşa Kurdan a li herêmê hat gotûbêjkirin. Li gorî nûçeya ANHAyê her du alî gihaştine biryarekê ku komîteyeke hevbeş bê avakirin û amadekarî bê kirin.
Hejmara Kurdan li Parêzgeha Reqayê zêde nîne lê ji ber ku Girê Spî li gorî pergala îdarî ya Sûriyeyê girêdayî Reqayê ye ev mijar ji bo Kurdan gelek girîng e. Ligel gundewarên wê beşek mezin a niştecihên Girê Spî Kurd in. Di dema dagirkeriya Tirkiyê de Kurd bi darê zorê hatin koçberkirin. Bi vê boneyê xebatên li vê parêzgehê jî girîng in.
