Li Êlih, Wan, Şirnex, Sêrt, Mêrsîn, Tişrîn û gelek navendên din bi deh hezaran kesên li dora Agirê Newrozê kom bûn û Newroz bi coşek mezin pîroz kirin azadiya fizîkî ya Rêberê PKKê Abdullah Ocalan xwestin.
Bi deh hezaran welatiyên li gelek navendan kom bûn, di tariya şevê de agirê Newrozê geş kirin û bi coşeke mezin Newroz pîroz kirin.
Êlih
Komîteya Amadekar a Êlihê bi dirûşma “Rêbertiya Azad Civaka Demokratîk” û “Ji bo azadiyê Neworza Civaka Demokratîk” li taxa Îpragazê Newroz pîroz kir. Bi bezaran şêniyên Êlihê li taxa Îpragazê kom bûn û agirê Newrozê geş kirin. Bi hezaran welatiyên li ser kolana Cizîrê kom bûn, bê navber dirûşmeyên “PKK gel e, gel li vir e”, “Newroza te pîroz be ey serok Apo”, “Bijî serok Apo”, “Bê serok jiyan nabe”, “Jin jiyan azadî”, “Ciwan fedaiyên Apo ne” û “Em ê bi berxwedanê biser bikevin” berz kirin. Pîrozbahiyê bi rêzgirtinê dest pê kir. Girseyê piştî rêzgirtinê strana “Çerxa şoreşê” xwendin û dirûşm berz kirin. Ciwanan piştî agirê Newrozê geş kirin li dora agirê Newrozê govend gerandin. Beşdaran bang li hemû gelê Êlihê kirin û xwestin di 20ê Adarê de beşdarî Newroza mezin bibin.
Riha
Meclisa Ciwanan a DEM Partiyê ya Rihayê jî li taxên Sulêmaniye û Baglarbaşi yên Navçeya Haliliyeyê bi girseyî Newroz pîroz kir. Ciwanên ku li taxan kom bûn bê navber dirûşmeyên “Newroz pîroz be”, “PKK gel e, gel li vir e.” “Ciwan fedaiyên Apo ne.” Û “Bijî Serok Apo” berz kirin. Ciwan piştî meşê li nava taxê agire Newrozê pêxistin û li dora agirê Newrozê gavend gerandin. Şêniyên taxê jî bi tilîlîyan piştgirî dan ciwanan.
Şirnex
Komîteya Amadekar a Newrozê ya Cizîrê jî bi heman hişyarî û dirûşmê li Kolana Mezbaha ya taxa Nurê kom bûn û bi dirûşmeya “Bijî Serok Apo” Newroz pîroz kirin. Bi sedan kesên beşdarî Newrozê bûn li dora agir stran gotin û govend gerandin.
Wan
Komîteya Amadekar a Wanê dê sibê li Wanê bi dirûşma “Rêbertiya Azad Civaka Demokratîk” û “Ji bo Azadiyê Newroza Civaka Demokratîk” Newroza dîrokî pîroz bikin. Beyira Newroza sibê li Taxa Koyîçî bi hezaran welatî kom bûn û Newroz bi coşeke mezin pîroz kirin. Girseyê di pîrozbahiyê de posterê Rêberê Gelê Kurd Abdullah Ocalan vekirin û bê navber dirûşmeyên “Bijî Serok Apo”, “Bijî Newroz” û “Newroza te pîroz be ey Serok Apo” berz kirin. Girseya li dora agir kom bûn govend gerandin û stran gotin.
Mêrdîn
Li Mêrdînê jî jin li hev kom bûn û li kolanên dîrokî meşiyan. Jinan cilên neteweyî li xwe kirin û dirûşmeyên “Newroz Pîroz be”,” Jin jiyan, azadî” berz kirin.
Sêrt
Komîteya Amadekar a Newroza Sêrtê jî dê di 20ê Adarê de Newroza mezin pîroz bikin. Beriya Newrozê Hevşaredara Sêrtê Sofya Alagaş, endam û rêveberên DBP û DEM Partiyê ji bo Newroza 20ê Adarê belavok belav kirin. Nûneran bang li her kesî kirin û xwestin beşdarî Newrozê bibin.
Agirê Newrozê li Tişrînê geş bû
Li ser bendava Tişrînê agirê Newrozê hat pêxistin û Şehîdên Efrîn û Bendava Tişrînê hatin bibîranîn. Çalakvanên li bendavê wiha gotin, “Wê Newroza îsal bibe wesîleya azadiya fîzîkî ya Rêber Apo.”
Îro li bendava Tişrînê agirê Newrozê gur bû û şehîdên Efrîn û Bendava Tişrînê hatin bibîranîn. Çalakvanên li bendavê diyar kirin ku wê Newroza îsal bibe wesîleya azadiya fîzîkî ya Rêber Apo.
Çalakvana bi navê Narîn Xêrzada diyar kir ku wê vegera li Efrînê misoger bibe û wiha got:” Efrîn tu caran nehat ji bîr kirin, em ê vegerin Efrînê. Em newroza 2025’ab bikin Newroza azadiya fîzîkî ya Rêber Apo û em ê bikin wesîleya vegera li Efrînê jî. Em li vir in em li bendava xwe ne û me agirê Newroza xwe jî gur kiriye.”
Piştre find li dora bendavê hate pêxistin. Derdor bi wêneyên şehîdên bendavê û wesayîtên ku hatine rûxandin hate xemildandin û şehîd hatin bibîranîn.
Li Tarsûsê Newroz hat pîrozkirin
Li Taxa Barbaros a navçeya Tarsûs a Mêrsînê bi tevlîbûna hezaran kesî Newroz hat pîrozkirin. Agirê Newrozê ji aliyê Parlamenterê Partiya Wekhevî û Demokrasiyê ya Gelan (DEM Partî) yê Mêrsînê Alî Bozan û Hevseroka Bajêr Bedriye Kuş ve hat vêxistin. Di şahiyê de bêyî navber dirûşmeyên “Bijî Serok Apo”, “Bê Serok jiyan nabe” û “Şehîd namirin” berz kirin.
Di şahiyê de Bedriye Kuş axivî. Kuş banga tevlîbûna şahiya Newrozê ya di 22ê Adarê de li Qada Mîtîngê ya Tirmilê de bi dirûşma “Rêbertiya Azad Civaka Demokratîk” bê lidarxistin kir.
Parlamenterê DEM Partiyê Alî Bozan jî axivî û wiha got: “Banga Birêz Ocalan a 27ê Sibatê ne tenê li Tirkiyeyê li Rojhilata Navîn û hemû cîhanê bi kelecan hat pêşwazîkirin. Me weke Kurdan û DEM Partiyê got, ‘Em li pişt banga Birêz Ocalan in’. Heta azadî û demokrasî were li ser vê axê em li pişt vê bangê ne. Di heman demê de çawan bi salan me têkoşîn meşand û em ê bi heman awayî têkoşînê bidomînin.”
