Meclisa Ziman a Şaredariya Rezanê bi boneya 15ê Gulanê Cejna Zimanê bernameyeke hunerî ya berfireh li dar xist. Bernameya ku rastî eleqeyeke mezin hat veguherî mihrîcanê.
Li Amedê bernameyên ji bo 15ê Gulanê Cejna Zimanê Kurdî berdewam dikin. Meclisa Ziman a Şaredariya Rezanê ya Amedê bi boneya 15ê Gulanê Cejna Zimanê Kurdî li baxçeyê avahiya xizmetê ya şaredariyê bernameyeke hunerî ya berfireh li dar xist. Hevşaredarê Rezanê Sîraç Çelîk, endamên meclîsê û gelek kes beşdarî bernameyê bûn.
Hevşaredar Sîraç Çelîk di vekirina bernameyê de axivî û destnîşan kir ku zimanê dayikê rûmet û hebûna gel e û her xebata ku ji bo pêşxistina zimanê Kurdî tê kirin, ji bo wan di ser her tiştî re ye. Çelîk bang li welatiyan kir ku di her qada jiyanê de li ziman û çanda xwe xwedî derkevin.
Pîrozbahî bi nîşandana berhemên hunerî yên kursiyeran û pêşangeha wêneyan a zarokan berdewam kir. Di bernameyê de ciwanan bi xwendina helbestên, stranên koroyê û lîstikên gelêrî coşeke mezin dan nîşandan. Her wiha lîstika şanoyê ya ku hat pêşkêşkirin ji aliyê gel ve bi dilgermî hat pêşwazîkirin. Beşa herî balkêş a pîrozbahiyê ew bû ku ciwanan bi kincên neteweyî pêşengên wêje û hunera Kurdî mîna Celadet Alî Bedirxan, Cegerxwîn, Feqiyê Teyran, Eyşe Şan û Sûsîka Sîmo li ser sehneyê zindî kirin. û
Malbatên ku bi şanazî li zarokên xwe temaşe kirin, bi tîlîlî û çepikan beşdarî pîrozbahiyê bûn û bername bi gerandina govendê bi dawî bû.
