Dadgeha Gelan a Rojava li Zanîngeha Azad a Brukselê dest bi darizandina Dewleta Tirk kir.
Dadgeha Gelan a Rojava li L’Université Libre de Bruxelles (Zanîngeha Azad a Brukselê – ULB) dest bi darizandina Dewleta Tirk kir. Ji welatên cuda hiqûqnas, aktîvîstên mafên mirovan, mexdûrên êrîşan û şahid tevlî bûn. Dagehê ji bo parastina xwe bike bang li dewleta Tirk kirin. Lê li gel vê yekê jî nûnerê Dewleta Tirk tevlî nebû. Darizandin bi rengekî xiyabî tê kirin.
Biacinto Bisogni ewil axaftina destpêkê kir û got: “Ji bo vê dadgeha girîng em li hev kom bûn û darizandin wê du rojan dewam bike. Bi piştgiriya Zanîngeha Azad a Brukselê em vê dadgehê pêk tînin. Ji bo parastina mafên mirovan û parastina Rojava em li vê derê ne. Rojava ew cih e ku azadiya jinê û demokrasî lê tê avakirin; ji ber vê yekê jî divê bê parastin. Hûn hebûn bi xêr hatine.”
Li dadgehê wê sûcên kuştina sivîlan, rojnamevanan û siyasetmedaran, êrîşa li ser binesaziyê, êşkence, kiryarên li derveyî mirovahiyê û bikaranîna çekên qedexekirî bêne nirxandin.
Bernameya roja destpêkê
– 09:00 – 09:30: Qeyd û pêşrûniştin
– 09:30 – 09:45: Danasîna endamên dadgehê
– 09:45 – 10:15: Axaftina destpêkê ya dozgeriyê
– 10:15 – 12:30: Rûniştina 1’emîn
– 13:30 – 15:00: Rûniştina 2’yemîn
– 15:15 – 17:50: Rûniştain 3’yemîn
Amadekarî û saziyênn piştevan
Dadgeh ji aliyê Komîteya Têkiliyên Derve ya Rêveberiya Xweser a Bakur û Rojhilatê Sûriyeyê, koma parêzeran a ku sûcên dewleta Tirk dişopîne, Navenda Parastin û Lêkolînê ya Mafên Jinan û rêxistinên cuda yên mafên mirovan ve tê lidarxistin.
ULB, MAF-DAD (Komeleya Hiqûqê ya Navneteweyî û Demokrasiyê), ELDH (Komeleya Hiqûqnasan a Demokratîk a Ewropayê), IADL (Komeleya Hiqûqnasan a Demokratîk a Navneteweyî), Kongreya Neteweyî ya Kurdistanê (KNK) û Enstîtuya Kurd a Brukselê jî piştgiriya çalakiyê dikin.
