Şirnex – Dayikên Aştiyê yên Botanê bal kişandin ser êrişên Tirkiyeyê li ser Başûrê Kurdistanê û gotin ku ji bo aştî pêk were divê dewlet êrişên xwe rawestîne û heta êriş hebin aştî pêk nayê.
Tevî xwefesixkirina PKKê jî êrişên li dijî deverên Başûrê Kurdistanê li ser gerîlayan berdewam dike. Navenda Ragihandin û Çapemeniyê (NRÇ) a HPGê di 5ê Hazîranê de ragihand ku piştî biryara xwefesixkirina PKKê jî êrişên Tirkiyeyê bi awayekî giran li ser herême berdewam dike û di encama êrişan de 2 gerîlayên PKKê jiyana xwe ji dest dan e. HPGê di heman demê de bang li raya giştî kir ku ji bo pêvajoya çareseriyê biçe serî li dijî êrişan rabe.
Endamên Meclisa Dayikên Aştiyê yên Botanê ku zarokên wan di şer de jiyana xwe dest dane, nerazîbûn nîşanî êrişên Tirkiyeyê dan û destînşan kirin ku ji bo pêvajoya çaresriyê encam bigire divê Tirkiyeyê ewilî êrişên xwe li ser herêmê rawestîne.
‘Kengê êriş bisekinin wê demê em ê qala aştiyê bikin’
Ji Dayikên Aştiyê Ayşe Hezer bi lêv kir ku ji bo baweriya wan ji pêvajoya çareseriyê bê divê dewlet jî gavên şênber biavêje û wiha got: “Em weke Dayikên Aştiyê dixwazin pêvajoya ku dest pê kiriye bi aştiyeke bi rûmet û mayînde encam bigire. Divê êrişên Tirkiyeyê rawestin û em bi awayekî wekhev bi hev re bijîn. Heke êriş nesekinin aştî pêk nayê. Heke dewlet êrişên xwe bidomîne şer wê kurtir bibe bi êrişan aştî pêk nayê. Hê jî bi çekên kîmyewî êrişan berdewam dikin. Ev yek zerareke mezin dide pêvajoya aştiyê. Weke dayik em dixwazin hemû girtiyên siyasî bên berdan û êriş rawestin. Weke Dayikên Aştiyê heta ev êriş hebin, em qala aştiyê nakin. Kengî êriş sekinîn û girtiyên siyasî hatin berdan wê demê em ê qala aştiyê bikin.”
‘Ji bo aştî pêk were divê dewlet jî êrişên xwe rawestîn e’
Halîm Baykara jî anî ziman ku weke dayikên aştiyê ew li dijî şer û kuştinê ne û wiha axivî: “Divê dewlet jî li gorî peyama birêz Abdullah Ocalan tevbigere û gavan biavêje. Ji bo ev pêvajo biçe serî divê di destpêke de girtiyên me yên siyasî bên berdan û êriş werin rawestandin. Em êdî naxwazin kuştin çêbibe. Heke êriş û kuştin hebin aştî çênabe. Aştî bi gava yek alî nabe divê dewlet jî gav biavêje. Lê dewlet tu gav neavêtine. Heta ev êriş hebin em nabêjin aştî heye. Ji bo aştî pêk were divê dewlet jî êrişên xwe rawestîn e û gavan biavêje.”
‘Em ji bo aştiyê li dijî êrişan bisekinin’
Kimet Acar jî bi lêv kir ku aştî bi gav avêtina yek alî pêk nayê û ev yek anîn ziman: “Em ji bo pêvajoyê gelek kêfxweş in. Lê Aştî bi yek alî çênabe. Divê dewlet jî gavan biavêje. Dewletê hê jî êrişên xwe ranewestandin e, divê dewlet jî êrişên xwe rawestîn e. Divê girtiyên nexweş û birêz Abdullah Ocalan jî bên berdan ku aştî pêk were. Banga me ji hemû kesî re heye ku ji bo aştiyê li dijî êrişan bisekinin. Gel jî rabe li ser pêyan û li dijî êrişan bisekinin. Heta êriş hebin baweriya gel bş aştiyê nayê. Heta şer nesekine aştî wê çawa pêk were. Firsendeke baş heye ji bo me hemûyan, divê dewlet jî vê firsendê baş bikar bîne.”
