Amed – Ji parêzerên Doza Kobanê Mehmet Emîn Aktar têkildarî biryara bihincet a Doza Kobanê diyar kir ku piştî biryara îstînafê ew ê nexşerêyê amade bikin û got: “Divê biryara siyasî ji holê were rakirin. Ev doz binpêkirina mafên mirovan e.”
Dadgeha Îstînafê biryara bihincet a Doza Kobanê ku Hevserokên Giştî yên berê yên HDPê Selahattîn Demîrtaş û Fîgen Yuksekdag girti têne darizandin, salek şûnde aşkere kir. Di dozê de 108 siyasetmedar tên darizandin. Li 24 kesan cezayê hefsê hate birîn. Biryara bihincet ku ji 32 hezar rûpelan pêk tê hate amadekirin. Bi biryarê re rê hate vekirin ku kesên ji dozê tên darizandin serî li Dadgeha Îstînafê bidin. Yek ji parêzerên Doza Kobanê û Serokê berê ya Baroya Amedê Mehmet Emîn Aktar biryara bihincet a Dadgehê ji Ajansa me re nirxand.
‘Di dîrokê de 32 hezar rûpel biryara bihincet nehatiye nivîsandin’
Mehmet Emîn Aktar diyar kir ku komîsyonek dikare encax salekê biryara bihincet a Doza Kobanê bixwînê û got: “Di biryarê de gelek tişt bi dehan caran hatiye dubarekirin. 32 hezar rûpel hatine nivîsîn. Di dîroka tevahiya cîhanê de 32 hezar rûpel biryara bihincet nehatiye nivîsandin. Dema ku biryar hat aşkerekirin. Divê em di 15 rojan de li îstînafê îtiraz bikin. Lê dê kîjan parezer karibe 32 hezar rûpele di 15 rojan de bixwîne û îtîraz bike? Dadgeh di ev biryar 13 mehan nivîsandiye. Dadgehê di serî de mafê darizandinê binpê kiriye. Em dizanin ku doza Kobanê siyasî bû. Armanc girtina HDPê bû. Xwestin kesên di nava HDPê de sîyasetê dikin ji sîyasetê dûr bixin. Di 2018an de midûriyeta polisan a Enqerê nîşe da dadgehê. Ev nîşe di nava dosyayê de hatibû ji bîrkirin û ket destê me. Di nîşeyê de lîste heye û tê xwestin ku ji wan kesan re doz bê vekirin. Dadgeh jî li gorî vê doz vekiriye.”
Dadgeh dixwaze peyamê bide
Prz Mehmet Emîn Aktar anî ziman ku dadgeh cezayekî bêbingeh dide û wiha axivî: “Dadgeh naxwaze biryar bê şîrovekirin. Dadgeh dixwaze ku bi vê rêyê kesên ku biryarê bibînin bibêjin 32 hezar rûpel hebe li vir sucdar jî hene. Lê em dizanin ku hejmera rastî a biryarê bi sedan rûpel e. Dadgeh bi vê hejmara zêde ya rûpelan dixwaze peyamê bide.”
‘Banga HDPê demokratîk e’
Mehmet Emîn Aktar biryara Dadgeha Mafê Mirovan a Ewrupayê jî bibîr xist û wiha pêde çû: “Biryara wekî sûc tê nişandan ne suç e. HDPê bangawazî kiriye û gotine; ‘Derkevin kolana û dest bi protestoyan bikin.’ Îro CHP jî heman bangê dike. Lê tu kes nehat sucdarkirin û doz ji wan re nehat vekirin. Banga HDPê jî bi awayekî demokratîk e û nayê darizandin. Piştî ev biryar ji Dadgeha Bilind derkevê em ê serî li DMMEyê bidin.”
‘Em dixwazin biryara siyasî bi dawî bikin’
Mehmet Emîn Aktar herî dawî anî ziman ku piştî îstînaf biryarê bide ew ê nexşerêyê derxin û wiha bi dawî kir: “Dosya dê herê îstînafa Enqerê. Îstînaf dikarê 3 biryaran bide. Yek xirakirina biryarê ye, ya din dikarê ji nûve biryar bide an jî dosyayê bişîne Dadgeha Bilind, ya dîtir jî Îstînaf dikare ji nû ve biryarê bide û beraat bike û dosyayê betal bike. Divê girtî bên berdan. Em dixwazin ku biryara siyasî ji holê bê rakirin û li gorî hiqûqê biryar bê dayîn.”
