Di 10emîn Festîvala Şanoyê ya Amedê de ku ji aliyê Şaredariya Bajarê Mezin a Amedê û Şanoya Bajêr Amedê ve tê organîzekirin, lîstika “Bekoyê Ewan” derket ser dikê û heta dawiyê temaşevan kenand.
Li Amedê 10emîn Festîvala Şanoyê ya Amedê de ku ji aliyê Şaredariya Bajarê Mezin a Amedê û Şanoya Bajêr a Amedê ve tê organîzekirin, berdewam dike. Duh êvarê di çarçoveya festîvalê de lîstika “Bekoyê Ewan” a Yenî Sahneyê ya Batmanê li Çand Amedê derket ser dikê.
Karakterê “Bekoyê Ewan” ê ku di destana Memê Alan a berhema edebiyata gel a ku bi çanda dengbêjiyê ji nifş bi nifş hatiye veguhestin û heta roja me hatiye, û her wiha di berhema nemir a Ehmedê Xanî ya Mem û Zînê de derbas dibe, bi performansek komedî lîstikvanên Yenî Sahneyê ya Batmanê derketin pêşberî temaşevanan.
Gelek welatî temaşeyî lîstikê kirin. Temaşevanan bi kêfxweşî li lîstikê temaşe kir. Ji destpêka lîstikê heta dawiyê şanohez li ber keniyan.
Mem û Tacdîn plan dikin û derman didin Beko û wî radizînin. Dema ku Beko şiyar dibe, li qesra mîr, bi cilên mîr li ser xwe û hemû kes bi rêzdarî li ber destên wî rawestiyan e dibîne û matmayî dimîne û di nav lîstikê de lîstikeke din dest pê dike. Piştî demekê Beko xwe mîr dihesibîne û hemû hîle û fesadiyên ku berê kiriye eşkere dike.
Îhsan Arat derhêneriya lîstikê kiriye, werger û alîkariya derhêneriyê Yakup Selîmoglu kiriye. Di lîstikê de Yakup Selîmoglu, Hasan Bayam, Serdar Biçimli, Kenan Demîr, Burhan Afşîn, Murat Kurhan, Mehmet Sevîlgen, Gurbet Çelîk, Hasret Selîmoglu, Maria Ata û Kenan Atalay rol girtin e.
Di dawiya lîstikê de temaşevan rabûn ser pêya û ji lîstikvanan re li çepikan dan. Şanoger Şîrîn Alma ê ku piştî 30 salan vegeriya Kurdistanê plaket da lîstikvanan. Şîrîn Alma axaftinek kurt kir û got ew ji ber çalakiyên bi vî rengî gelek kêfxweş in.
