Seroka Wekhev a Komeleya Pîr Sûltan Abdal Ayfer Artan bang li Neteweyên Yekbûyî û sazî û dezgehên navneteweyî kir ku li dijî komkujiyên li Sûriyeyê li ser Elewiyan pêk tên bêdeng nemînin.
Platforma Ked û Demokrasiyê ya Amedê, Komeleya Pîr Sûltan Abdal, Komîsyona Bawerî û Gelan a DEM Partiyê û Komeleya Alimên Olî bi daxuyaniyeke hevpar têkildarî komkujiyên li Sûriyeyê li ser civaka Elewî pêk tên li Qada Şêx Seîd a Amedê daxuyanî dan çapemeniyê. Gelek endam û rêveberên saziyên sivîl ên civakî û partiyên siyasî beşdarî daxuyaniyê bûn. Di daxuyaniyê de pankarta “Ji Komkujiyên li dijî gel û baweriyên li Sûriyeyê re bêje bes e” hate vekirin.
Seroka Wekhev a Komeleya Pîr Sûltan Abdal Ayfer Artan anî ziman ku komkujiyên pêk tên qebûl nakin û wiha got: “Komkujiyên li Sûriyeyê li dijî elewiyan pêk tên komkujiya li dijî êzidiyan, xirîstiyanan û ermenan beriya niha pêk hatine plansaziyeke li dijî pergala netewa demokratîk e.”
‘Divê ewlekariya çand û jiyanî bê mîsogerkirin’
Ayfer Artan bang li Neteweyên Yekbûyî (NY) û sazî û dezgehên navneteweyî kir ku li dijî komkujiyên li Sûriyeyê pêk tên bêdeng nemînin û got: “Em li ser navê gel û baweriyan careke din bang dikin, divê ewlekarî, çandî û jiyanî ya gelan divê di çarçoveya qanûnî û destûrî de bê diyarkirin. Pradîgmaya ku li Rojava tê pêkanîn ji aliyê civakan ve were hembêzkirin û were pêşvebirin, wê bibe bingehê bidawîkirina van komkujiyan û pêkhatina azadiyan.”
Dêrsim
Platforma Ked û Demokrasiyê ya Dêrsimê jî bi heman armancê meş li dar xistin û daxuyanî dan. Girseyê ji Kuçeya Hunerê heta Qada Seyîd Riza meş li dar xist û li vir daxuyanî hat dayîn û hat xwestin ku komkujiyên li dijî civaka Elewî ya li Sûriyeyê pêk tên bê rawestandin.
