Hevserokê DEM Partiyê yê Amedê Abbas Şahîn têkildarî kampanyaya îmzeyê ya “Aştiyê dixwazim ji ber ku” diyar kir ku li Amedê bi deh hezaran îmze hatine komkirin û got: “Me vê kampanyayê ji bo xatirê aştiyê da destpêkirin, ji ber ku gelê me êdî li benda aştiyê ye.”
Di 17ê Îlonê de Partiya Wekhevî û Demokrasiyê ya Gelan (DEM Partî) kampanyaya îmzeyê ya bi dirûşma “Aştiyê dixwazim ji ber ku” dabû destpêkirin. Li gelek bajarên Kurdistan û Tirkiyeyê kampanya berdewam dike. Îmzeyên ku hatine komkirin dê radestî Serokatiya Meclîsa Tirkiyeyê bên kirin. Hevserokê DEM Partiyê yê Amedê Abbas Şahîn têkildarî kampanyayê axivî.
‘Ji bo pêvajo were fêmkirin me gelek xebat kirin’
Abbas Şahîn diyar kir ku bi banga Rêberê Gelê Kurd Abdullah Ocalan pêvajo dest pê kir û got: “Ev pêvajo ji heman pêvajoyên din cudatir e. Di vê pêvajoyê de derket holê ku divê hişmendiya desthilatê jî were guherandin. Ji bo ev pêvajo wekî pêvajoya guherandinê hat dîtin. Ev pêvajo ji bo bi ser bikeve rêyeke dirêj li pêşiya me ye. Pirsgirêken 100 salan hene ev jî bi çend rojan çareser nabin. Me jî ji bo pêvajo were fêmkirin gelek xebat li dar xist.”
‘Gel xwedî li vîna xwe derdikeve’
Abbas Şahîn destnîşan kir ku Rêberê Gelê Kurd Abdullah Ocalan vînek derxistiye holê û wiha got: “Rêberê Gelê Kurd Abdullah Ocalan got ez ê vê pêvajoyê heta dawiyê bibim. Gelê Kurd jî xwedî li vîna birêz Abdullah Ocalan derdikeve. Ji bo ev vîna Rêberê Gelê Kurd bê fêmkirin me bi hezaran civîn li dar xist û em bi gel re hatin cem hev. Di pradîgmaya Rêberê Gelê Kurd Abdullah Ocalan de veguherandina hişmendiyê heye, divê hişmendiya desthilatê jî were guherandin. Heke ev pêk neyê aştî jî pêk nayê.”
‘Divê Rêberê Gelê Kurd azad be’
Abbas Şahîn anî ziman ku kampanyaya îmzeyan a “Aştiyê dixwazim ji ber ku” berî mehekî dest pê kir û di dawiyê de ev yek got: ““Me bi ve kampanyayê re gelek xebatên din jî meşand. Gel bi tevlibûna xebatan vîna xwe nîşan da. Me vê kampanyayê ji bo xatirê aştiyê da destpêkirin, ji ber ku gelê me êdî li benda aştiyê ye. Li Amedê bi deh hezaran îmze hatine komkirin. Kampanya hê jî berdewam dike. Em ê van îmzeyan bişînin Meclîsê. Li 17 navçeyên Amedê kampanyaya îmzeyan didome. Em aştiyê dixwazin ji ber ku xeyala me ya komareka demokratîk, jiyanak hevpar heye. Em aştiyê dixwazin ji ber ku ev ax aidî me ye. Em naxwazin pêşeroja xwe qurbanî şer bikin. Em aştiyê dixwazin ji ber ku divê Abdullah Ocalan azad be.”
