Amed – Festîvala Fîlman a Amedê bi nîşandana fîlmên cûr bi cûr di roja duyemîn de berdewam dike. Derhêner Zanyar Muhammadîneko ku tev li festîvalê bûye wiha got: “Em dixwazin gelê me çanda xwe di nava fîlman de bibîne.”
Festîvala Fîlman a Amedê ya Sêyemîn ku bi mêvandariya Şaredariya Bajarê Mezin a Amedê û bi organîzetoriya Komeleya Akademiya Sînemayê ya Rojhilata Navîn û Sinebîrê tê lidarxistin di roja duyemîn de berdewam dike. Di roja duyemînde li Çand Amedê fîlmê “RA” ku derhêneriya wî Devrîm Tekînoglû dike, fîlmê “Li Baxçeya me Dareke Zeytûnê Hebû” ku derhêneriya wî Miral Kilo dike, fîlmê “Zalava” ku derhêneriya wî Arsalan Amîrî dike, filme “IDO” ku derhêneriya wî Saman Mûstafa dike, fîlmê “Aysha” ku Cengîz Akaygun derhêneriya wî dike, fîlmê “PEL’E” ku Şoreş Wekîlî derhêneriya wî dike û fîlmê “Ev tenê qezayek bû” ku derhêneriya wî Cafer Panahî dike hatin nîşandan. Gelek kesan fîlm temaşe kirin.
Derhêner û çêker Zanyar Muhammadîneko jî ji rojhilatê Kurdistanê tev li festîvalê bûye. Zanyar Muhammadîneko têkildarî fîlmên xwe yên “Pala” û “Şiwênpence” û li ser mijara di nava sînemayê de zimanê Kurdî axivî ji ajansa me re axivî.
‘Festîval bibe cihekê ku em bikarin xwe îfade bikin’
Zanyar Muhammadîneko da zanîn ku nêzî 12 sal in wekî derhêner û çêker di nava sînemayê de cih digire û wiha got: “Li ser sînemayê saziyekê min jî heye. Ez bi wê saziyê hewl didim ku li her çar aliyê Kurdistanê filman belav bikim. Ji her aliyê Kurdistanê filman çêdikim. Îro jî bi gelek fîlman tev li festîvalê dibim. Em dixwazin festîval bibe cihekî ku em bikarin xwe lê îfade bikin. Sînemaya welatê xwe pêşkeşî gelê xwe bikin. Em dixwazin gelê me çanda xwe di nava fîlman de bibîne. Ji bo gelê xwe wekî neteweyekê nîşan bide hewceye ku sînemaya me jî hebe.”
‘Di nava sînemayê de ji bo mirov xwe nas bike ziman girîng e’
Zanyar Muhammadîneko anî ziman ku li her aliyan pirsgirêken ziman hene û wiha domand: “Li Rojhilatê mamosteyên zimanê Kurdî tên girtin. Hê jî di girtîgehê de ne. Lê li Rojhilat ji aliyê hişmendiyê ve gel baştir e. Zarokên Amedê li kolanan nikarin bi Kurdî biaxivin. Li Rojhilat zarok dikarin bi zimanê Kurdî xwe îfade bikin. Divê ziman mirovan li ser koka xwe bihêle. Heke ziman çû mirov xwe ji bîr dike. Ziman her tişt e. Di nava sînemayê de ji bo mirov xwe nas bike ziman girîng e. Ji ber ku di nava sînemayê de tu dikarî çand û hebûna xwe bidî nasîn.”
Festîval bi nîşandana fîlmên cuda didome.
