Platforma Şaxan a KESKê ya Îzmîrê, li dijî tundiya li dibistanan û polîtîkayên perwerdeyê yên Wezareta Perwerdeyê di roja 2yemîn de çalakiya kar berdana xwe domand û diyar kir ku êrişên li ser mamoste û xwendekaran ne mûnferîd in, encama polîtîkayên şaş in.
Li Îzmîrê kedkarên cemaweriyê bi pêşengiya Platforma Şaxan a KESKê ya Îzmîrê ji bo bertek nîşanî êrişên li ser dibistanên li Siwêreg û Mereşê bidin, di roja 2yemîn de çalakiya xwe ya berdana kar berdewam kir. Kedkar li ber YKMa Konakê civiyan û ji vir heta Midûriyeta Perwerdehiyê ya Neteweyî ya Bajarê Îzmîrê meş li dar xistin.
Meş li li ber Midûriyeta Perwerdeya Neteweyî ya Îzmîrê bi dawî bû û daxuyaniya çapemeniyê hat dayîn. Di daxuyaniyê de pankarta “Êdî bes e, ji tundiya di perwerdeyê de re bibêje raweste, Yusuf Tekin îstifa bike” hate vekirin; her wiha dirûşmên “Wezîrê sermayeyê Yusuf Tekin bila îstifa bike”, “Em ê teslîmî tarîtiyê nebin” û “Heke tundî hebe xizmet tune ye” hatin berzkirin. Serokê Şaxa Egîtîm Senê ya Hejmara 1ê ya Îzmîrê Hamdî Çalik ve hate xwendin.
‘Heta sedem ji holê neyên rakirin encam naguherin’
Hamdî Çalik diyar kir ku ev êriş encama polîtîkayên xelet in ku bi salan e tên meşandin û heta ku sedem ji holê neyên rakirin, encam naguherin û got: “Ji ber ku di êrişên li pey hev ên li dibistanên me de xwendekar û mamosteyên me jiyana xwe ji dest dan û gelek ji wan jî birîndar bûn, em ji 15ê Nîsanê û vir ve kar berdidin û derdikevin qadan. Bi rojan e em li ser pirsgirêkên di perwerdeyê de, çavkaniyên van pirsgirêkan diaxivin û pêşniyarên xwe yên çareseriyê tînin ziman. Em balê dikşînin ser daxwazên kedkarên perwerdeyê, xwendekar û welatiyan. Em dibêjin; bûyerên ku em dijîn ne mûnferîd in.”
‘Dema bi palayan êrişî xwendekaran dikin hûn li ku ne?’
Hamdî Çalik bal kişand ser karkerên Temel Contayê yên ku serê sibê bi hinceta “xerabkirina sîkunetê” hatine binçavkirin û got: “Em hîn bûn ku serê sibê karkerên Temel Contayê yên ku bi mehan e ji bo mafên xwe têdikoşin, bi hinceta xerabkirina sîkunetê hatine binçavkirin. Em bang li wan dikin ku dema kesek li mafê xwe digere ‘huzura’ wan dişkê! Dema bi palayan êrişî xwendekaran tê kirin, çima huzura we naxeribe? Hûn wî çaxî li ku ne?”
Hamdî Çalik di berdewamiyê de anî ziman ku îstifayên pêwîst nayên kirin û daxuyanî bi van gotinan bi dawî kir: “Dema tundiya li dibistanan didomin, di serî de Wezîrê Perwerdeyê, niyeta tu berpirsiyarî tune ye ku bi îstifakirinê rêya çareseriyê veke. Daxwazên ji bo dabînkirina xwarinek û ava paqij ji bo xwendekaran, nayên bihîstin. Li şûna ku dawî li koletiya zarokan û cînayetên zarokan ên di MESEMan de bînin, karkeriya zarokan heta dibistanên navîn belav dikin. Cudahîkirina dibistanan wekî ‘dibistanên bikalîte’ û ‘dibistanên bêkalîte’ berdewam dike; ji bo ji holê rakirina vê korta kûr û newekheviya di navbera zarokan de tu gav nayên avêtin.”
