Navenda Nûçeyan – Gelê Bakur û Rojhilatê Sûriyeyê, li dijî êrîşên dewleta Tirk û çeteyên xwe dispêre wê daketin qadan û bertekên xwe anîn ziman.
Şêniyên Qamişlo, Dêrik û Amûdê li hember êrîşên çeteyên dewleta Tirk meşên girseyî li dar xistin.
Qamişlo
Şêniyên Qamişloyê bi meşeke girseyî planên dewleta Tirk a dagirker ên li ser Sûriyeyê şermezar kirin û berxwedna gelê Şêxmeqsûd û Eşrefiyê yên Helebê silav kir. Şêniyan bi dirûşma “Bi rihê gel ê şoreşgerî em ê dagirkeriyê têk bibin” ji Çerxerêya Sonî heya Çerxerêya Şehîd Rûbar meşiyan. Di meşê de pankartên “HSD vîn û rûmeta me ye”, “HSD mertalê ewlehiya Bakur û Rojhilatê Sûriyeyê ye”, “Berxwedan jiyan e”, “HSD gel e, gel li vir e” û “Axa Bakur û Rojhilatê Sûriyeyê dê ji Erdogan re bibe goristan” vekirin.
Girse li Çerxerêya Şehîd Rûbar sekinî. Piştî deqeya rêzgirtinê endamê Însiyatîfa Gel a Azadiya Rêber Abdullah Ocalan Yûsif Kûtê axivî.
Yûsif Kûtî, diyar kir ku li dijî herêmên Bakur û Rojhilatê Sûriyey êrîşên dijwar ên qirêjî tên kirin û got: “Ev êrîş bi rêya çeteyên Heyet Tehrîr El Şamê ango Cebhet El Nusra tê kirin. Berê pozên van çeteyan li Serêkaniyê, Til Birak û Til Hemîsê hatibûn şikandin. Ev çete bi desteka dewleta Tirk a faşîst a Erdoganî berê pusuleya xwe dana bakurê Sûriyeyê an ku Heleb, Idlib û Hemayê.”
Yûsif Kûtî, bal kişand ser Şêxmeqsûd û Eşrefiyê jî û wiha domand: “Gelê me yê li taxên Şêxmeqsûd û Eşrefiyê hatiye dorpêçkirin. Gelê me yê li Şehba û Til Rifetê jî li gel êrîşên dewleta Tirk a dagirker û çeteyên wê di demeke zor û zehmet de ne.”
Yûsif Kûtî, bal kişand ser helwesta Rûsyayê jî û ev yek li gotinên xwe zêde kir: “Rûsyayê rê li ber Tirkiyeyê vekiriye da ku Mîsaqî Millî bi cih bîne û devera ji Heleb heya Mûsilê dagir bike.”
Yûsif Kûtî, bang li gelê Bakur û Rojhilatê Sûriyeyê kir ku li dora QSD’ê be û got: “Ji bilî îradeya me tu hevalbendên me nîn in.”
Dêrik
Şêniyên li Dêrikê jî bi heman armancê meşeke girseyî li dar xist. Şêniyan ji Qada Azadî dest bi meşê kir. Meş li navenda bajar veguherî mîtîngê. Li wir hevserokê Şaredariya Gel a Dêrikê Ciwan Hesen axivî û ev peyam da: “Em serî ji planên navneteweyî yên qirêjî re natewînin. Divê em berxwedana xwe ya li hemberî dewleta Tirk a dagirker û çeteyên wê mezin bikin.”
Amûdê
Li Amûdê jî bi sedan kes li dijî êrîşên dewleta Tirk a dagirker û çeteyên wê meşek li dar xist. Meşê ji Çerxerêya Jina Azad heta Çerxerêya Şehîd Cîhad dewam kir. Endama Însiyatîfa Gel a bajarê Amûdê Murad Zoro li wir axivî û got ew amade ne her tiştî pêşkêşî koçberên Efrîn û Şehbayê bikin. Murad Zoro bang li şêniyan kir ku li dijî panên dagirkeriyê li qadan bin.
