Li Şirnexê bi sedan kes li dijî destdirêjayiya li ser zarok û jinan ku di Van demên dawî de zêde bû ye meşiyan û bertek nîşanî polîtikayên bê cazahiştinê dan.
Platforma Jin û Zarokan a Şirnexê, li dijî destdirêjayiya ser zarokan li navenda Şirnexê meşiya. Tevgera Jinên Azad (TJA), Rêxistinên Partiya Herêmên Demokratik (DBP) û Partiya Wekhevî û Demokrasiyê ya Gelan (DEM Partî) ên Şirnex û navçeyên wê, Baroya Şirnexê, sazî û rêxistinên sivîl ên Şirnexê, parlamenterên DEM Partî, Newroz Uysal Aslan, Mehmet Zeki Îrmez, Cengîz Çîçek û bi sedan kes tevlî çalakiyê bûn.
Girsê li qada Cumhuriyetê kom bûn û bi pankarta li ser, “Her der sûc e, destdirêjayiya li ser zarok û jinan bide sekinandin” dinivisî heta qada Omer Kabak meşiya. Girse di meşe de bênavber dirûşmeyên, “Destdirêjayî mirine” “Şirnex deng bide bêdeng nemîne”, “Jin jiyan azadî” û “Şirnex ranekeve xwedî li zarokan derbikeve” berz kirin. Her wiha girseyê dovîzên li ser, “Xeyalên zarokan tarî nêkin”, “Zarok bêdeng dimîne tu bêdeng nemîne” û “Îstîsmara zarokan polîtîk e” dinivisîn hilgirtin. Welatiyên Şirnexê jî bi çepikan piştgiriya da çalakiyê.
‘Destdirêjayiya li ser zarok û jinan zêde bû ye’
Li qada Omer Kabak daxuyanî hat dayin. Metna daxuyaniyê endama Baroya Şirnexê Emîne Ozdemîr xwend. Emîne Ozdemîr anî ziman ku li ser Şirnexê bi salanê polîtikayên şerê taybet tên meşandin û anî ziman ku di encama polîtikayên şerê taybet de destdirêjayiya li ser zarok û jinan zêde bû ye. Emîne Ozdemîr bal kişand destdirêjayiya Yusuf Acar a li dijî zarokan û destdirêjayiya li ser zarok û jinan û wiha rêz kir;
“*Li Şirnexê, di êvara cejnê de, dema ku du keç ji kar vedigeriyan malê, ji aliyê polîsan ve rastî tacîzê hatin.
*Çend meh berê, xwendekarek lîseyê li Şirnexê ji aliyê parêzvanê parêzgar ve rastî tacîza cinsî hat.
*Di 3 mehên dawî de, çend mamosteyên ku li dibistanên Şirnexê dixebitin îstîsmarî ciwanên xwendekar kirin.
*Dev ji parastina polîs û hezên dewletê yên li Şirnex û Kurdistanê destdirêjayiya zarok û jinan dikin berdin.
*Ji bo ku pergalek dadwerî ya bêalî di dozên tacîz û tecawizê de bixebite, çi hewce be bikin.”
‘Ya ku zarok û jinan biparêze azadiya civakî ye’
Piştre jî parlamentera DEM Partiyê ya Şirnexê Newroz Uysal Aslan axivî. Newroz Uysal Aslan jî bertek nîşanî polîtikayên bê cezahiştinê da û ev tişt gotin: “Destdirêjayiya li ser zarokan, tundiya li ser jinan encama polîtikayên bêcezahiştinê û pergala mêrsalariyê. Di dibistan, qursên Quranê û li her derê zarok rastî destdirêjayiyê tên. Ji ber wê jî parastina zarokan erka hemû civakê ye. Ji emniyet û dozgerî nikare zarokên me biparêze. Yên ku destdirêjayiyê li zarokan dikin heke hezên dewletê bin nayên cezakirin û pêşî nayê girtin. Berovajî vê yekê zêdetir dikin. Ya ku zarok û jinan biparêze azadiya civakî ye. Parastin weke banga birêz Abdullah Ocalan a Civaka Demokratîk e. Di civakeke demokratîk de em dikarin zarokan biparêzin.”
Daxuyanî bi lêdana çepik û berzkirina dirûşmeyan bi dawî bû.
