Komîsyona Girtîgehan a ÎHDê di çalakiyên li Stenbol û Enqereyê de, diyar kir ku rewşa girtiyên nexweş Alî Osman Kose û Hadî Elçîçek giran e û xwest girtiyên nexweş demildest bên berdan.
Komîsyona Girtîgehan a Şaxa Komeleya Mafên Mirovan (ÎHD) a Stenbolê çalakiya “Rûniştina F” a ku her hefte li dar dixe, di hefteya 669an de li ber avahiya komeleyê kom bû. Di çalakiya vê hefteyê de li ser rewşa girtiyê nexweş Alî Osman Kose ê 67 salî ku li Girtîgeha Tîpa F ya Hejmara 1 a Tekîrdagê girtî ye rawestiyan. Girseyê di daxuyaniyê de pankartên “Dermankirin maf e, nayê astengkirin” û “Bila girtiyên nexweş bên berdan” vekirin. Gelek parêzvanên mafên mirovan beşdarî daxuyaniyê bûn û dirûşmeyên “Bila girtiyên nexweş bên berdan” û “Tecrîd dikuje, hevgirtin jiyan e” berz kirin. Parêzvanê mafên mirovan Turker Demîrcî, diyar kir ku girtî Alî Osman Kose tevî ku gelek nexweşînên wî hene jî bi awayekî “ne hiqûqî” li girtîgehê tê girtin û nexweşiyên Kose rêz kirin. Demîrcî got: “Alî Osman Kose yê 67 salî ku 40 sal in di girtîgehê de ye; nexweşîna pençeşêrê û hipertansiyon pê re heye û li gel vê guhên wî baş nabihîzin, ji ser hişê xwe diçe, nikare baş baixive û bi zorê dimeşe. Nikare bi tena serê xwe pêdiviyên xwe dabîn bike.”
Turker Demîrcî ku îfadeya parêzer Doga Încesûyê ya ku çûbû serdana Kose ragihand wiha got: “Muwekîlê min Kose bi kursiya bi teker anîne cihê hevdîtinê. Wî diyar kir ku her tim gêja wî diçe û nikare li ser pêyan bisekine û hema bêje guhên wî baş nabihîsin. Diyar kir ku ne ji hevalên wî yê hucreyê be wê nikaribe bi tena serê xwe jiyana xwe îdame bike.”
Turker Demîrcî destnîşan kir ku divê dengê girtiyên nexweş bê bihîstin. Çalakî bi berzkirina dirûşmeyan bi dawî bû.
Enqere
Înîsiyatîfa Ji Girtiyên Nexweş re Azadî di hefteya 541ê de ji bo balê bikşînin ser rewşa girtiyên nexweş li Kolana Sakaryayê kom bû. Di daxuyaniyê de pankarta “Mafê dermankirinê nayê astengkirin, ji girtiyên nexweş re azadî” vekirin. Di çalakiya vê hefteyê de li ser rewşa girtiyê nexweş Hadî Elçîçek ê li Girtîhgeha Tîpa F a Kurkçuler a Edeneyê tê girtin rawestiyan.
Endama ÎHDê Kezban Kalinê der barê girtiyê nexweş Hadî Elçîçek de wiha got: “Hadî Elçîçek di 16ê Sibata 1999an de hat binçavkirin û ji aliyê Dadgeha Ewlehiyê ya Dewletê (DGM) ve hat darizandin û cezayê muebbetê yê girankirî lê hat birin. Paşê biryara binpêkirina darizandina adil at dayîn û piştî vê biryarê Elçîçek di 9ê Kanûna 2021ê de ji Girtîgeha Tarsûsê hat berdan û darizandin jinûve dest pê kir. Piştî hat berdan li Nexweşxaneya Bajêr a Edeneyê hat dermankirin û nexweşxaneyê ji sedî 86 rapora astengdariyê da wî.”
Kezban Kalinê diyar kir ku Elçîçek bi nexweşîna pençeşêrê û nexweşîna dil ketiye û got: “Ji ber vê kemoterapî dibû. Tim diçû nexweşxaneyê. Berî bê berdan jî di lîsteya girtiyên nexweş a ÎHDê de bû.”
Kezban Kalinê diyar kir ku piştî dosye çû Dadgeha Bilind û dadgehê dosyeyê erê kir, Elçîçek di 7’ê Çileya 2025an de ji nava nivînan hatiye derxistin û ew birine Girtîgeha Tîpa F a Kurkçuler a Edeneyê. Kezban Kalinê da zanîn ku divê Elçîçek ji ber nexweşîna xwe di şertên hijyenik de bijî, lê belê şert û mercên girtîgehê ji bo wî ne guncan in.
Kezban Kalinê bilêv kir ku Elçîçek nikare bi tena serê xwe bijî û xwest demildest bê berdan.
