Parlementera DEM Partiyê Gulderen Varliyê di axaftina xwe ya parlementoyê de bal kişand ser sansura li dijî Çapemeniya Azad tê kirin û bang li gel kir ku Çapemeniya Azad bişopînin.
Parlamentera Partiya Wekhevî û Demokrasiyê ya Gelan (DEM Partî) ya Wanê Gulderen Varliyê di axaftina xwe ya li Lijneya Giştî ya Meclîsê de bal kişand ser êrişên li ser Çapemeniya Azad û li dijî astengiyên gihiştina malperên JINNEWS, Ajansa Mezopotamya û rojnameya Yenî Yaşamê bertek nîşan da. Gulderen Varliyê bang li gel kir ku Çapemeniya Azad bişopîne.
‘Astengkirin bûye polîtîkayek sîstematîk’
Gulderen Varliyê di axaftina xwe ya parlementoyê de wiha got: “Çapemeniya Azad li Tirkiyeyê di bin êrişeke dijwar de ye. Rojnamevan rastî lêdanan tên, di binçavan de rastî îşkenceyê tên û dixwazin ji ber ragihandina nûçeyan wan bêdeng bikin. Ev hewldanek e ji bo bêdengkirina çapemeniyê û bêagahîhiştina civakê. Astengkirinên gihîştinê yên li ser Çapemeniya Azad êdî bûye polîtîkayeke sansurê ya sîstematîk. Malperên ajansên nûçeyan ên Jinnews, Mezopotamya û rojnameya Yeni Yaşamê têne girtin û gihiştina hesabên medyayên dîjîtal ên rojnamevan, rayedarên hilbijartî û gelek welatiyên bêhejmar bi awayekî keyfî tên astengkirin. Wekî din, serdegirtina duh a li ser ajansa nûçeyan a ETHAyê berdewamiya vê yekê ye.
Mafê raya giştî yê agahdarkirinê tê binpêkirin û azadiya ramanê jî tê paşguhkirin. Ev kiryarên sansurê nîşana tirsa ji rastiyê ne. Çapemeniya Azad heta niha bêdeng nebûye û ji niha û pê ve jî bêdeng namîne. Bi rihê ‘Hevgirtin dide jiyandin.”
