Girtiya siyasî Şerîfe Mihemedî ya ku li girtîgeha Îranê cezayê darvekirinê lê hatiye birîn, diyar kir ku hêzên Îranê îşkence lê kirine û got, “Nabe mirov di nava xem û perîşanî de bijî û çok dayne, divê mirov bi hêvî bijî.”
Girtiya siyasî Şerîfe Mihemedî ku li girtîgeha Lakan a Îranê tê ragirtin û cezayê darvekirinê lê hatiye birîn, di derbarê pêvajoya dadgehkirina xwe û nêzîkatiyên dewleta Îranê de peyamek parve kir.
Şerîfe Mihemedî di peyama xwe de diyar kir ku berpirsên girtîgeha Lakan di roja ji dayîkbûna wê de jêre ragihandine ku cezayê darvekirinê lê hatiye birîn.
Berfirehiya peyama Şerîfe Mihemedî wiha ye: “Di dema lêpirsînê de di jêr êşkenceyê de xwestin ez îtirafên hatine nivîsîn îmze bikim. Lê min nepejirand, ji ber wê carek din êşkence li min hat kirin, zirer gihandin rûyê min.
Piştî êşkenceyê, serûçavên min reş û şîn bûn, sê mehan ez xistim di hucreya yekkesî de û ez tevlî jinên din ên girtîgehê nekirim. Di wê demê de min 14 kîlo wenda kir. Sedemê cezakirina min ew e ku zêdetirî 10 sal in endamê komîteya hemahengî û alîkariyê li gel sazî û rêxistinên karkeran im. Min hemû çalakiyên xwe bi awayek eşkere kirine.
Ez hê jî nizanim bê ka min çi sûc kiriye ku ev cezayê neheq hatiye dayîn. Lê carek din bihar hatiye û ti zivistanek wê heta hetayî berdewam nebe. Nabe mirov di nava xem û perîşanî de bijî û çok dayne, divê mirov bi hêvî bijî.”
