Şaredariya Farqînê û heval û xizmên hunermendê nemir ê muzîka Kurdî Hozan Şiyar ew di salvegera wefata wî de li ser gora wî bi bîranîn. Beşdaran destnîşan kir ku ew ê heta dawiyê li ser şopa şehîdên doza azadiyê bin.
Şaredariya Farqînê û heval û xizmên Hozan Şiyar (Celal Sarikaya) di salvegera wefata wî de ew li ser gora wî ya li Goristana Şêx Xelîl a li navçeya Farqînê ya Amedê bi bîr anîn. Hevşaredarên Farqînê Sevîm Bîçîcî û Kadrî Esen û heval û xizmên Hozan Şiyar tev li bernameya bîranînê bûn. Bername bi deqîqeyek rêzgirtinê dest pê kir.
‘Hem bi sekna xwe hem bi stranên xwe mirovekî cuda bû
Di bernameyê de ewilî yek ji hevalên Hozan Şiyar ên nêzîk Seyîdxan Roj axivî û wiha got: “Heval Şiyar hem sekna xwe hem bi stranên xwe mirovekî cuda bû. Bi hesreta Farqînê çû. Beriya ku rehmet bike li Ewropayê wesîyeta xwe dike û dibêje ‘Dema em çûm ser dilovaniya xwe min bibin Kurdistanê, bibin Farqîna rengîn.”
‘Em ê heta dawiyê li ser şopa wan bin’
Dû re Hevşaredar Kadrî Esen axivî. Kadrî Esen diyar kir ku Hozan Şiyar kedên girîng dane çand, huner û muzîka Kurdî û got: “Ji ber zextên lê hatin kirin dest ji têkoşîna xwe bernade û neçar dimîne diçe Ewropayê. Bi hesreta welat li Ewropayê jiyana xwe ji dest dide û li ser wesiyeta wî li vê goristanê tê veşartin. Bi vê minasebetê em wî bi rêzdarî bi bîr tînin û bejna xwe li ber keda wî ya çand û muzîka Kurdî ditewînin. Em ê heta dawiyê li ser vê şopê bin û meqseda şehîdên doza azadiyê, hunermendên Kurd bibin serî.”
Di dawiyê de beşdaran gul danîn ser gora hunermend Hozan Şiyar û li ser gorê strana wî ya “Şêrînamin” ku yek ji berhemên navdar ên Hozan Şiyar e gotin.
