Amed – Welatiyên ku tev li Newroza Çinarê bûn cejna Newrozê li Rêberê Gelê Kurd Abdullah Ocalan pîroz kirin. Welatiyan destnîşan kir ku ji ber banga Rêberê Gelê Kurd Abdullah Ocalan ji dil û can Newrozê pîroz dikin.
Duh li navçeya Xana Axparê(Çinar) ya Amedê bi dirûşma “Rêbertiya Azad Civaka Demokratîk” newroz hat pîrozkirin. Welatiyan bi coş û kelecaneke mezin, bi taybet jinan bi cilên neteweyî newroz bi govend û dîlanê pîroz kirin. Welatiyên ku tevî pirozbahiya newrozê bûn ji Ajansa Welat re axivîn.
‘Ji bo ku aştî pêk were divê Serok azad bibe’
Welatiyê bi navê Ali Kahraman anî ziman ku dixwazin newroza îsal bibe newroza azadî, aramî û aştiyê û wiha got: “Ji banga birêz Abdullah Ocalan vir ve germahiyek ketiye nava gel. Ji ber banga serok newroz bi dil û can tê pîrozkirin. Ji bo ku ev pêvajo, aştî mayinde bibe gere serokatî bi awayekî fîzîkî di nav gel de be pêşengtiyê bike. Em hêvîdarîn ku êdî ev şer biqede, em li vî welatî bi hev re jiyaneke bi rûmet bijîn.”
‘Ev banga Serok ji bo tavahî Rojhilata Navîn girîng e’
Weltiyê bi navê Ridvan Once jî da zanîn ku Ji bo destê Rêberê Gelê Kurd xurt bibe gere heft salî heya heftê salî her kes tevli newroza îsal bibe û axaftina xwe wiha domand: “Ez newroza îsal li her çar aliye Kurdistanê, li Rêber Ocalan pîroz dikim. Li vir heya Îmraliyê hezar caran silav dişinim. Ev banga Serok ji bo tavahî Rojhilata Navîn bangeke girîng e. Gere herkes li vê bangê xwedî derkeve. Em vê komkujiya ku li Kobanê pêkhatî şermezar dikin. Çekberdan jî bi aliyekî tene nabe. Ji bo ku ev însanan biçin kongreyê gere şer bisekine, di nav şer de nikarin biçin kongreye. Ez cejna gelê Kurd û tevahî gelên ku baweriya wan bi newrozê heye pîroz dikim.”
‘Dewlet gav neavêje aştî pêk nayê, şer nasekine’
Dayika bi navê Mehdiye Temiz ji bi lêvkir ku dixwazin Rêberê Gelê Kurd ji zindanê derkeve û got: “Ev 50 salin xwîn diherike, pirsgirêk bi xwînê nayê çareserkirin, birsgirêk bi demokrasiye, aştî, azadî û wekheviyê tê çareserkirin. Bi xwînê çareserî pêknayê, çiqasî me bikujin jî nikarin me tune bikin. Gelê Kurd li her çar parçeyên Kurdistanê jî li ber xwe dide. Em wekheviyê, biratiyê dixwazin, xwînê naxwazin, bes e êdî. Ez silavên xwe ji hemû girtiyan re, ji gerîlayan re, ji Rêberê gelê Kurd re dişinim. Dewlet û meclis jî gere gavên aştiyê, çareseriyê bavêjin. Dewlet gav neavêje aştî pêk nayê, şer nasekine.”
