Şirnex – Welatiyên tev li çalakiya nobedê ya li dijî êrişên li ser herêmên Bakur û Rojhilatê Suriyeyê tê lidarxistin bûn bertek nîşanî êrişan û qetilkirina welatiyên sivîl dan û gotin: “Bi êrişên li dijî Rojava aştî pêk nayê. Ji bo aştî pêk bê divê êrişên li ser Rojava rawestin.”
Êrişên dewleta Tirk û komên paramîlîter ên girêdayî wê yên li dijî herêmên Bakur û Rojhilatê Suriyeyê didomin. Hêzên Suriyeya Demokratîk (HSD), Yekiniyên Parastina Jinan (YPJ) û Yekiniyên Parastina Gel (YPG) li dijî êrişan herême diparêzin. Êrişên dewleta Tirk û komên paramîlîter ên girêdayî wê yên li ser Bendava Tişrînê jî didomin. Gelên li herêmê li dijî êrişên Tirkiyeyê 13 roj in xwe kirine mertalên zindî û nobedê digrin. Dewleta Tirk bi SÎHA û ÎHAyan welatiyên di nobedê de ne hedef digire û zarok, jin, kal û pîr di nav de welatiyên sivîl qetil dike.
Li dijî êrişên dewleta Tirk ên li ser herêmê li bakurê Kurdistanê jî çalakiyên cûr bi cûr tên li darxistin. Di çarçoveya çalakiyên li dijî êrişan de li navçeya Cizîrê ya Şirnexê çalakiya nobedê hat lidarxistin. Welatiyên tev li çalakiya nobedê bûn ji Ajansa me ya Welat (AW) re axivîn û daxwaza rawestandina êrişên li ser herême kirin. Yek ji welatiyê tev li çalakiya nobedê bibû Umît Aşkin bi lêv kir ku ew ji bo êrişên li ser Bakur û Rojhilatê Suriyeyê rawestin çalakiya nobedê li dar dixînin û ev tişt gotin: “Em aştiyê dixwazin. Em dibêjin bila zarok, jin û welatî nemirin. Tu carî zilm bi serneketiye. Ji kesên ku zilmê dikin re jî em dibêjin dev ji zilma xwe berdin û em bikarin bi hev re jiyaneke wekhev bijîn. Banga me ya li gelê Kurd jî ew e ku yekitiya xwe ava bikin û li dijî vî şerî xwedî sekin bin.”
‘Bi êrişkirina Rojava re aştî pêk nayê’
Welatiya bi navê Rûken Bayik jî bi lêv kir ku ew li dijî şer in û wiha got: “Bi şer û kuştinan nikarin kurdan xilas bikin. Em jî ji bo şerê li Rojava raweste hatin li vir û çalakiya nobedê li dar dixînin. Banga me ji gelê Kurd re jî ew e ku xwedî li Rojava derbikevin.”
‘Divê hemû Kurd li dijî êrişan bibin yek’
Welatiyê bi navê Abdûlvahap Altmiş jî destnîşan kir ku ew aştiyê dixwazin û ev tişt anîn ziman: “Divê hemû Kurd li dijî êrişan bibin yek. Tirkiye ne ji dil e. Lê baweriya me li me heye. Bi êrişkirina Rojava re aştî jî pêk nayê. Ji bo aştî pêk were divê êrişên li ser Rojava rawestin. Ji bo êrişên li Rojava rawestin em jî li vir çalakiyên cûr bi cûr li dardixînin. Li dijî êrişên li ser Rojava ne. Ji aliyekî ve dibêjin aştî û ji aliyê din ve Kurdên li Rojava bombebaran bikin em vê qebûl nakin.”
‘Rojava her tiştê me ye’
Welatiyê bi navê Ali Gun jî diyar kir ku ew ji bo piştgiriya li Rojava tev li nobedê bûne û axaftina xwe wiha domand: “Ew dema dibêjin ’em xwişk û birayê hev in’ jî birayên ker û kor dixwazin. Ji xwe re xwişk û birayên kole digerin. Lê gelê Kurd jî ne gelê beriya sed salan e. Gelê Kurd jî têra xwe dîtiye û têdikoşe. Divê gelê Kurd vê carê winda nekin. Ji aliyê siyasetê ve jî divê ev yek baş bê şopandin.”
‘Em bi hêvî ne ku weke Kobanê serbikevin’
Welatiya bi navê Aynûr Elçioglû jî bi lêv kir ku li dijî hemû gelê Kurd êriş hene û wiha got: “Weke jin û dayikekê ez jî dixwazim ev şer bisekine. Rojava her tiştê me ye. Çi dibe bila bibe em ê xwedî li Rojava derbikevin. Banga me ji hemû gelê Kurd ew e ku yekitiya xwe ava bikin û vê koletiyê qebûl nekin. Em edî vê koletiyê qebûl nakin. Em ê heta dawiyê li pişt Rojava bin. Em bi hevî ne ku weke Kobanê em ê biserbikevin.”
