Bi daxuyaniyan hat diyarkirin ku di navbera Îsraîl û Libnanê de hevdîtin dest pê dikin. Lê Îsraîlê jî pira herî dawî ya di navbera başûr û bakurê Libnanê de bombekir û têkiliyan başûr û bakur ji hev qut kir.
Serokomarê Libnanê Michel Aoun, derbarê rageşiya bi Îsraîlê re daxuyaniyek belav kir û diyar kir ku agirbest ji bo destpêkirina muzakereyên rasterast “xaleke xwezayî” ye. Di heman demê de, artêşa Îsraîlê bi lêdana pira dawî ya li başûrê welat, peywendiya herêmê bi temamî qut kir.
Banga Aoun: Divê Îsraîl vekişe
Serokkomar Michel Aoun li ser medyaya civakî ragihand ku Libnan dixwaze êrîşên li ser sivîlan û rûxandina gund û bajaran bi dawî bibe. Aoun destnîşan kir ku vekişîna hêzên Îsraîlê ji axa Libnanê gava herî giring e û wiha got: “Ji bo peydakirina agirbestê, divê artêşa me heta sînorên navneteweyî were bicihkirin û dawî li hemû nîşaneyên çekdarî were anîn.”
Pira dawî ya li başûrê Libnanê hat rûxandin
Li aliyê din, artêşa Îsraîlê di êrîşeke asmanî de pira dawî ya ku başûrê Libnanê bi herêmên din ên welat ve girêdida, rûxand. Berpirsekî ewlehiyê yê Libnanê ji ajansa Reutersê re ragihand ku ev pir bi temamî hatiye “hilweşandin” û êdî çêkirina wê ne pêkan e. Bi vê êrîşê re, xeta lojîstîk û alîkariyê ya ber bi başûr ve bi temamî hat birîn.
Muzakereyên di bin siya bomberanê de
Tevî ku Trump mizgîniya hevdîtina rasterast ya lîderên her du welatan dabe jî, rûxandina binesaziya Libnanê nîşan dide ku Îsraîl zexta leşkerî li ser maseya muzakereyê didomîne. Pispor hişyarî didin ku rûxandina piran dê krîza mirovî ya li herêmê hîn kûrtir bike.
