Komên çete êrişên li dijî xelkê sivîl li taxên Şêxmeqsûd û Eşrefiyê yên Helebê didomîne. Li gorî agahiyên ji herêm hatine bidestxistin; li Eşrefiyê 2 caran nexweşxanê hatiyê bombebaran kirin û welatî birîndar bûn.
Komên çete yên girêdayî hikûmeta demkî ya Şamê û Tirkiyeyê ji şevê din ve bênavber bi çekên giran, tank û topan êrişî taxên Kurdan Şêxmeqsûd û Eşrefiyê dikin. Di nav van komên êrişkar de komên Hemzat, Emşat, Sultan Murad û Nureddin Zengî yên giredayî Tirkiyeyê jî hene. Gel û hêzên ewlehiyê yên taxan bersiv didin êrişan. Di encama êrişan de heta niha 12 welatiyan jiyana xwe ji dest da û 64 kes jî birîndar bûne.
Li gorî agahiyên ku ji herêmê ji bo ajansa me hatin ragihandin; li Eşrefiyê ji aliyê komên çete ve du caran nexweşxane hatiye bombebarankirin. Di encama êrişan de tê gotin ku welatî hatine kuştin û gelek kes jî birîndar bûne. Her wiha tê gotin ku hezên Ewlehiyê li Eşrefiyê bersiv dane çeteyan nahêlin ku derbasî nava taxê bibin.
Welatiyek ji taxê: Şer giran e
Her wiha welatiyek ji taxan peyamek bi deng şand û wiha dibêje: “Êriş berdewam dikin. Nîşana serkeftinê heye. Êrişên li ser Şêxmeqsûd tên şikandin. Di nav çeteyan de leşkerên Tirk jî hene. Komên çetê yên giredayî Tirkiyeyê jî hene. Di nav wan de îstîxbarata Tirkiyeyê jî heye. Cenazeyên xwe li kolanan dihêlin û direvin. Di navbera hev de Tirkî diaxivin û direvin. Em hêvî dikin ev reva wan dê bibe serkeftina me.”
