Hevseroka DBPê Çîgdem Kiliçgun Uçar di pîrozbahiya Newroza Hezexê de axivî û komkujiya li Kobanê li dijî malbatekê pêk hat şermezar kir. Çîgdem Kiliçgun Uçar got: “Bila ev Newroz bibe wesîleya azadiya rêzdar Ocalan.”
Li Bakurê Kurdistanê û Tirkiyeyê bi dirûşmeya, “Rêbertiya Azad Civaka Demokratîk” li 89 navendan Newroz tê pîrozkirin. Di çerçoveya pîrozbahiya Newrozan de li navçeya Hezexê ya Şirnexê bi pêşengiya Partiya Herêmên Demokratîk (DBP), Tevgera Jinên Azad (TJA) û DEM Partiyê Newroz hat pîrozkirin. Pîrozbahî li Qada Newrozê ya navçeya hat lidarxistin û hezaran kes tev li bûn. Hevseroka Giştî ya DBPê Çîgdem Kiliçgun Uçar, Hevberdevka DEM Partiyê Ayşegul Dogan, parlamenterên DEM Partî yên Şirnexê Newroz Uysal Aslan, Mehmet Zekî Îrmez, hevşeredara bajarê mezin a Mêrdînê Devrîm Demîr ku qeyûm tayînî şûna wê hatiye kirin beşdarî pîrozbahiyê bûn.
Jinan qada Newrozê xemiland
Xelkê Hezexê bi cil û bergên Kurdî û xemla kesk, sor û zer berê xwe dan qada Newrozê. Welatiyan bi gerandina govendê dest bi pîrozbahiyê kir. Ji 7 salî heta 70 salî zarok, jin, pîr û ciwan tev li Newrozê bûn û qada Newrozê bi cil û bergên xwe xemilandin. Jinên ciwan û temên mezin jî bi fîstanên xwe yên sipî ku yek jî taybetmendiya herêma Botanê ye pîrozbahiyê xweşik kirin. Beriya bername dest pê bike welatiyan li qada Newrozê bi coşeke mezin govend gerandin. Piştre axaftin hatin kirin. Bernameya Newrozê bi rêzgirtina ji bo kesên di têkoşîna azadî û demokrasiyê de jiyana xwe ji dest dane dest pê kir. Di rêzgirtinê de girseyê bi yek dengî sûrida “Çerxa Şoreşê” xwendin. Endamên Meclisa Ciwanan a DEM Partiyê ji bo bîranîna Kemal Kurkut ê di Newroza 2017an a Amedê de ji aliyê polîs ve hatibû kkuştin pankarta bi nivîsa, “Tu kulîlka biharê ya hê nebişkivî ye Kemal Kurkut” dinivisî hilgirtin.
Dayikên Aştiyê kevokên spî firandin
Piştî rêzgirtinê endamên Meclisa Dayikên Aştiyê girse silav kirin û bi firandina kevokên spî pêyama aştiyê dan. Ayşe Hezer li ser navê Dayikên Aştiyê axivî. Ayşe Hezer anî ziman ku ew Newrozê hemû cihanê pîroz dike û got: “Ez Newroza hemû girtiyan pîroz dikim. Em dibêjin ev pêyama birêz Ocalan wê aştî û azadiyê bîne. Ev peyama aştî, azadî û wekheviyê ye.” Girseyê jî bê navber dirûşmeya, “Bijî Serok Apo” berz kir.
‘Em piştgiriya banga Aştî û Civaka Demokratîk dikin’
Hevserokên DBPê û DEM Partî yên Şirnex û navçeya Hezexê, parlamenterên Şirnexê Newroz Uysal Aslan, Mehmet Zekî Îrmez û hevşeredarê Hezexê Dogan Adilbelî derketin ser dikê û gel silav kirin. Piştî silavdayînê Hevşeredara Merdînê Devrîm Demîr axivî û anî ziman ku agirê Kawayê Hesînkar pêxistiyê îro bi hêviyek mezin geş dibe û wiha got: “îro hemû cihan qala têkoşîna Kurdan dike. Bangeke sedsalê û hebûn û tunebûna Kurdan diyar dike hat kirin. Em piştgiriya banga Aştî û Civaka Demokratîk a birêz Abdullah Ocalan dikin. Ev bang ji bo hemû gel û baweriyan e. Lê divê êdî bombe li ser gelê Kurd neyên barandin. Em bang li rêyedarên dewletê jî dikin ku gav biavêjin. Êdî gavavêtin dora dewletê ye.”
‘Divê di serî de deriyê Girava Îmraliyê bên vekirin’
Aysegul Dogan jî di pîrozbahiyê de axivî û bi gotina “Newroza Serok Apo jî pîroz be” dest bi axaftina xwe kir û ev yek anîn ziman: “Newroz ji bo me Kurdan ne tenê roja cejnekê ye. Newroz ji bo me Kurdan xwe nûjenkirin û çareserî, aştî û jiyaneke nû ye. Gelê Kurd ji aliyekî ve kêfxweş e û ji aliyê din ve jî xemgîn e. Îro jî rojeke wisa ye. Duh bîranîna komkujiya Helebcê bû. Îro xeberek ji Kobanê hat. Kurd hemû ji bo Kobanê xemgîn in. Ji ber ku li wir malbatek hatiye bombebarankirin û qetilkirin. Em bi awayekî zelal aştiyê dixwazin. Em wekheviyê daxwaz dikin. Em qebûl nakin ku Kurd bên kuştin. Em desteserkirina vîna gelan qebûl nakin. Em dibêjin dev jî înkarê berdin ku bila raperîn nebe. Peyama me zelal e. Di destekî me de gul û di destekî me de bombe nîn e. Her du desten me jî ji bo aştiyê vekirî ne. Kesên bi Kurdan re aştiye pêk bînin bila êdî Kurdan nekujin. Em qebûl nakin. Em ji kuştin û bomberankirinê re dibêjin êdî bes e. Rêya ku ji aliyê rêzdar Ocalan ve hatiye vêkirin ji bo hemû gelen Rojhilata Navîn e. Bila bizanibin ew nexşere ne tenê ji bo gelê Kurd e, temînata hebûna hemû gelan e. Divê hemû kes piştgiriyê bidin banga rêzdar Ocalan. Divê di serî de deriyê Girava Îmraliyê bên vekirin. Felsefeya Jin Jiyan Azadî wê aştî û wekheviyê bîne ser vê erdnîgariyê.”
‘Agirê Newrozê li Botanê her geş bû’
Piştrê jî Hevseroka Giştî ya DBPê Çîgdem Kiliçgun Uçar axivî. Çîgdem Kiliçgun Uçar jî Newroza gel pîroz kir û wiha axivî: “Agirê Newrozê herî zêde li Botanê geş bû. Botan bû navnîşana berxwedana Newrozê. Di encama vê berxwedanê de em dikarin îro li vê qadan Newrozê pîroz bikin. Mazlûm Dogan di zindanê de li dijî tunehesibandina gelê Kurd xwe kir Newroz. Ew agir bi berxwedanê wî geş dibe û belavî tevahiya Kurdistanê bû.”
‘Em êrişa li Kobanê qebûl nakin’
Çîgdem Kiliçgun Uçar bal kişand ser qetilkirina malbateke ji Kobanê û wiha got: “Em qebûl nakin. Beramberî vê banga dîrokî ev bombebaran nayê qebûlkirin. Divê rêyedarên dewletê derbikevin û daxuyanî bidin. Bi milyonan Kurdan piştgiriya banga rêzdar Ocalan kirin. Lê hûn radibin komkujiyan dikin. Divê faîlên komkujiya Kobanê derkevin holê. Gelê Kurd li Kobanê di bin xeterê de ye. Di vê pêvajoyê de ev komkujî nayê qebûlkirin. Em qebûl nakin. Desthilat tenê li gelê Kurd binire wê bizanebe ku çi bike. Em bi êrişan neqediyan. Berê me li banga Abdullah Ocalan e. Em dibêjin hemû gelên Tirkiyeyê divê berê xwe bidin vê bangê. An em ê wekhev bijîn û an jî ev înkar wê berdewam bike. Înkar û pişaftin êdî li Kurdistanê ne bê wate ye. Gelê Kurd dibêje ez ê li welatê xwe azad bijîm. Banga rêzdar Ocalan li dijî înkarê ji bo hemû kesan azadî û wekhevî ye.
Azadiya Abdullah Ocalan
Hezex cihekî girîng e. Di salên 1990î de yek ji cihê ku herî zêde kuştinên faîl nediyar lê qewimîn. Em careke din malbata ku li Kobanê jiyana xwe ji dest daye bi rêzdarî bibîr tînin. Ev Newroz bila bibe wesileya azadiya birêz Ocalan û aştiyê.
Girseyê jî li qadê dirûşmeya, “Şehîd namirin” berz kir. Piştî axaftinan agirê Newrozê bi berzkirina dirûşmeyên “Bijî Serok Apo” û “Newroz pîroz be” hat pêxistin. Herî dawî jî stranbêj Mizgîn Turan derket ser dikê û stran gotin. Pîrozbahiya Newrozê li ber stran û gerandina govendê bi dawî bû.
