MKG û DFGê ji bo rojnameger Zeynep Durgut a ku gef lê hatibûn xwarin daxuyanî da û gotin: “Em li kêleka Zeynep Durgut in û em ê ji bo azadiya çapemeniyê têkoşîna xwe bidomînin.”
Komeleya Rojnamegerên Jin a Mezopotamyayê (MKG) û Komeleya Rojnamegeran a Dîcle Firatê (DFG) têkildarî nûçegihana Ajansa Mezopotamyayê (MA) Zeynep Durgut a ku ji ber “Çeteya Fihûşê” ya li Şirnexê derxist holê malbata Kenan Tatar gef lê xwar, li ber avahiya DFGê daxuyanî da.
Seroka MKGê Roza Metîna di daxuyaniyê de wiha axivî û got: “Bi nûçeyên Zeynep Durgut em serbilind in. Em tu carî ji rastiyê paşve gav navêjin. Beriya Zeynep Durgut, Rabia Onver jî hat tehdîtkirin. Divê tecawizkar, kesên ku di polîtîkayên şerê taybet de madeyên hişber belav dikin û kesên ku exlaqê gel xera dikin werin darizandin. Ne rojnamevan.”
Hevserokê DFG’ê Selman Çîçek jî ev tişt anî ziman: “Eger Zeynep nebûya, me yê bûyerên tecawiz û fihûşê nebihîstiba. Ne Zeynep û ne jî yên ku di kevneşopiya Çapemeniya Azad de dixebitin, dê paşve gav neavêjin. Vê kevneşopiyê fêrî me kiriye ku ‘divê rastî qet neyê tawîzdan’. Em careke din malbata Tatar hişyar dikin. Em li kêleka Zeyneb Durgut in û em ê di her rewşê de ji ber vê gefê wê berpirsiyar bigirin. Em li kêleka Zeynep Durgut in û em ê ji bo azadiya çapemeniyê têkoşîna xwe bidomînin.”
