NÇMê 34emîn salvegera damezrandina xwe pîroz kir. Hevserokên Giştî yê DBPê Keskîn Bayindir di şahiyê de axivî û destnîşan kir ku ew bi ked û têkoşîna şoreşa çand û hunera Kurdistanê gihîştine van rojan.
Navenda Çanda Mezopotamya(NÇM) salvegera xwe ya 34emîn bi dirûşma “Awazên Rojê” li Eywana Dawetê ya Ayaz Eleganceyê ya li navçeya Peyasa Amedê bi şahiyekî pîroz kir. Hevserokê Giştî yê Partiya Heremên Demokratîk (DBP) Keskîn Bayindir, Hevşaredarên Bajarê Mezin a Amedê Dogan Hatûn, hevşaredarên navçeyan, rêveberên DBPê, DEM Partiyê, nûnerên rêxistinên sivîl, Dayikên Aştiyê, aktîvîstên TJAyê, bi dehan xebatkarên NÇMê û bi sedan welatî tev li şahiyê bûn. Li eywanê cih nema. Ji heft salî heta heftê saliyan bûn mêvanê şahiyê.
Xebatkara NÇMê Sakîne Jîr axaftina destpêkê kir û qala NÇMê kir. Piştre jî ji bo cangoriyan çand û hunera Kurdistanê û hemû cangoriyên têkoşîna azadiyê û demokrasiyê rêz hat girtin. Paşê jî sînevziyona ku qala NÇMê dike hat nîşandan. Di şahiyê de welatiyan dirûşmên “Bijî berxwedan Rojava”, “ Bijî Serok Apo”, “ Şehîd namirin” û “Jin jiyan azadî” berz kirin.
Ewilî Koma Govendê ya Kasedjinê derket ser dika şahiyê û govendên herêmên Kurdistanê gerandin. Jinên govendgêr bi xeml û govenda xwe bala welatiyan kişandin ser xwe.
‘NÇM 34 sal in li dijî zilmê li ber xwe dide’
Hevşaredara Şaredariya Bajarê Mezin a Mêrdînê Devrîm Demîr ewilî axivî û diyar ku NÇM dergûşa soreşê ye û got: “Li dijî qirkirin û talankirinê ev dergûş 34 sal in li ber xwe dide û dê her tim jî li ber xwe bide. Wê bi berxwedana xwe hin bêtir mezin bibe.”
‘NÇM bi berxwedana xwe bi ser ket’
Piştre jî Koorînatorê Ma Musicê Şêrko Kanîwar axivî û da zanîn ku faşîzm 34 sal in bê navber êrişî çanda û zimanê Kurdan dike û wiha got: “Faşîzm dixwaze ziman û çanda Kurdan winda bike. Lê NÇM bi berxwedana xwe li dijî vê faşîzmê li ber xwe de û em dibêjin NÇM êdî bi ser ketiye. Kurd mafdarin û xwedî doz in. Tu carî nakevin. Faşîzm nikare çand û hunera Kurdî têk bibe. Em bên girtin, kuştin jî em ê zarokên Kurdistanê bê çand û bê muzîk nehêlin û em ê her tim şopdarê çanda Kurdistanê bin.”
Bi dû re Koroya Zarokan a Komeleya Çand û Hunerê ya Dîcleyê derket ser dikê û bi rîtmên xwezayî strîn û bala hemû kesên li eywanê dan ser xwe.
‘Em bi şoreşa çand û hunera Kurdî hatin van rojan’
Di vê navberê de Hevserokê Giştî yê DBPê Keskîn Bayindir jî derket ser dikê û xîtabî beşdarên şahiyê kir. Keskîn Bayindir destnîşan kir ku bi keda hunermendên Kurd Hozan Mîzgîn, Elî Temel, Sarya û bi dehan hunermendên din ew gihîştin van rojan û wiha axivî: “Armanca têkoşîna gelê Kurd di ruhê zarokên Kurdistanê de dîjî. Em dizanin ku têkoşîna gelê Kurd carna bi stranekî carna jî bi peyvekî di ruhê civakê de belav dibe. Rêberê Gelê Kurd rêzdar Abdullah Ocalan bi peyva ‘Kurdistan di bin metingeriyê de ye’ ev têkoşîn da destpêkirin. Niha jî ev têkoşîn mezin bûye û di ruhê hemû gelan de ye. Yên ku dibêjin çareserî bila bawerî, ruhê vî gelî binêrin û tekoşîna wan mêze bikin û biryara xwe bidin. Em bejna xwe li ber pêşengên çand û hunera gelê Kurd Elî Temel, Hozan Mizgînan ditewînin û bila ev şahî diyarî şehîdê Bendava Tişrînê û şanoger Bavê Teyar be. Bila ev şahî diyarî hemû şehidên Kurdistanê be.”
Paşê Koma JinMa jî derket ser dikê û stranan gotin û coş û peroşa li eywanê zêde kirin.
Herî dawî hunermendên Navenda Çanda Mezopotamya derketin ser dikê û stranên ji hev xweştir gotin û şahî li ber stranên hunermendan û gerandina govendê bi dawî bû.
