PENa Kurd û KNKê bi boneya Roja Rojnamegeriya Kurdî daxuyanî belav kirin û roja rojnamegerên Kurd pîroz kirin.
Komîteya Nivîskarên di Zîndanan de ya PENa Kurd û Kongreya Neteweyî ya Kurdistanê (KNK) derbarê 22yê Nîsanê Roja Rojnamegeriya Kurdî de daxuyaniyên nivîskî belav kirin û Roja Rojnamegeriya Kurdî pîroz kirin. Di daxuyaniyan de bal kişandin ser girîngiya “Rojnameya Kurdistanê” û Mîqdad Mîdhet Bedirxan bi bîr anîn.
PENa Kurd di daxuyaniya xwe de ev yek got: “Rojnamegeriya kurdî bi weşandina rojnameya “Kurdistan” a Mîqdad Mîdhet Bedirxan di 22’yê Nîsana 1898’an de, di dîrokê de cihekî giranbiha girt. Em dikarin vê dîrokê wekî dîroka berxwedaneke bêhempa pênase bikin. Ev serhildan û berxwedaneke li dijî zîhniyeta yekperest, li dijî sansur, înkar û zilmê ye. Gelê Kurd li her aliyê Kurdistan û cîhanê xwedî li vê mîrateyê derketiye. Tevî ku 128 sal derbas bûne, rojnamegeriya kurdî bi hêviyeke mezin her tim pêş ketiye.
‘Zext û astengî dewam dikin’
Di serdema îro de jî ev dorpêçkirina sîstematîk dewam dike. Gelek rojnameger bi awayekî nehiqûqî di girtîgehan de tên girtin. Zextên dadwerî û êrîşên dîjîtal li gel vê dewam dikin. Nahêlin rojnameger bi awayekî azad karê xwe bikin. Her wiha hesabên medyaya dîjîtal tên astengkirin. Li dijî vê yekê, têkoşîna karkerên çapemeniya azad her dewam dike. Her çiqas nûçe tên astengkirin û êrîş rasterast li ser mafên wan tên kirin jî, rojnamegerên kurd li her aliyê Kurdistan û cîhanê dest ji pênûsa xwe bernadin.
Hedefgirtina Çapemeniya Azad
Hatiye xwestin ku dengê gelê kurd bê birîn û çapemeniya azad bê bandor bê hiştin. Bi vê re, hatiye xwestin ku mafê civakê yê gihîştina rastiyan bê astengkirin. Ji ber ku karkerên çapemeniya azad her tim rastiyan eşkere dikin, dibin hedefa sereke. Bi taybetî jinên rojnameger, ji ber rol û mîsyona xwe ya girîng di nava civakê de, dibin hedef. Li qadan bi êrîşên zayendperest re rû bi rû dimînin, şopandina wan a nûçeyan tê astengkirin û tên darizandin. Jinên rojnameger tevî hemû zextên zayendperest jî li ber xwe didin.
Xeta Çapemeniya Kurd
Çapemeniya kurd her tim li ser esasê xeteke wekhev weşana xwe domandiye. Li dijî newekheviya civakê, li dijî tundiya li ser jin û civakê û li dijî neheqiyan sekiniye. Çapemeniya kurd her wiha bûye dengê bindestan. Li dijî polîtîkayên înkarê û zîhniyeta ku nasnameya gelê kurd tune dihesibîne, her tim li ber xwe daye.
Bangewazî
Lewma em wekî Komîteya Nivîskarên di Zindanan de ya PENa Kurd dibêjin; bila hemû nivîskar û rojnamegerên girtî serbest bên berdan û bikaribin bi awayekî azad pênûsa xwe bigirin destê xwe. Em rojnamegerên ku di oxira rastiyê de jiyana xwe ji dest dane bi rêzdarî bi bîr tînin û bejna xwe li hemberî keda wan ditewînin. Em bang li saziyên navneteweyî dikin; bila dengê rojnamegeran bibihîzin û li dijî neheqiyê bêdeng nemînin. Nivîsandina rastiyan ne sûc e. Divê em li hemû cîhanê nivîsandina rastiyan biparêzin.
Em wekî Komîteya Nivîskarên di Zindanan de ya PENa Kurd, dê her tim li gel rojnamegerên ku zilm li wan tê kirin bin. Em ê bibin dengê rojnamegerên ku tên darizandin û niha girtî ne. Em ê dev ji parastina rastî û heqîqetê bernedin. Pênûsa rojnamegerên ku êrîş li wan tên kirin, dê li erdê nemîne.”
KNK: Rola rojnamegeriya Kurdî girîng e
Di daxuyaniya KNKê de jî hat destnîşan kirin ku 128 sal berê, di 22yê Nîsana 1898’an de, bi pêşengiya Mîqdad Mîdhet Bedirxan, yekemîn rojnameya kurdî “Kurdistan” hatiye derxistin. KNKê ev roj wekî “meşaleyeke ku her tim ronahiyê dide” pênase kir û wiha got: “Gelê kurd di dirêjahiya dîrokê de bi polîtîkayên asîmîlasyon û qetlîaman re rû bi rû maye. Di vê pêvajoya ku wekî ‘Şerê Cîhanê yê Sêyem’ tê pênasekirin de, rola rojnamevaniya kurdî girîngtir bûye.”
Cangoriyên çapemeniyê hatin bibîranîn
KNK’ê rojnamevanên ku ji ber rastiyan tînin ziman jiyana xwe ji dest dane bi bîr anî û silav ji rojnamegerên girtî re şand.
