PENa Kurd û Komeleya Wêjekarên Kurd bi mazûvaniya Şaredariya Peyas, zêdetirî bi gelek nivîskar, rewşenbîr û weşangeran re hatin gel hev. Hevserokê PENa Kurd Omer Fîdan got ku PENa Naveneteweyî 15ê Gulanê wek roja piştgiriya zimanê Kurdî ya navneteweyî qebûl kir.
PENa Kurd û Komeleya Wêjekarên Kurd bi hevkariya Gerînendetiya Karên Çandî û Civakî ya Şaredariya Peyasê, bi beşdariya Cîgirên Hevşaredaran û Endamên Meclisê yên şaredariyê di xwarina ji bo hevgirtinê de bi nivîskar, ronakbîr û weşangeran re hatin gel hev.
Di destpêka civînê de Hevserokê Komeleya Wêjekarên Kurd Fatma Taşli Tunç axaftinek kir û got: “Bi vê civandina nivîskar, rewşenbîr û ronakbîran em kêm kêfxweş bûn. Di demên pêşiya me de kongreya Komeleya Wêjekarên Kurd heye, ez bawerim vê dilgermiya li vir peyda bûye, em dixwazin di kongreya Komeleya Wêjekarên Kurd de jî bibînin.”
‘PENa Navneteweyî 15ê Gulanê qebûl kir’
Pişt re Hevserokê PENa Kurd Omer Fîdan axivî û diyar kir ji ber organîzekirina vê şevê ji bo piştgirî û hevgirtinê li ser navê nivîskaran kêfxweş in û spasiya Şaredariya Peyasê kir. Omer Fîdan di berdewamiya axaftina xwe de got: “Kongreya PENa Kurd pêşnûmayek da PENa Navneteweyî da ku 15ê Gulanê Roja Cejna Zimanê Kurdî wek roja Piştgiriya Zimanê Kurdî ya Navneteweyî bê qebûl kirin. PENa Navneteweyî jî bi yek dengî ev pêşniyara me qebûl kir. Li gorî vê, bi minasebeta 15ê Gulanê Roja Cejna Zimanê Kurdî em ê konferansek navneteweyî li Amedê li dar bixin, bi piştgiriya PENa Navneteweyî û li gor vê biryarê tevbigerin. Di heman demê de, di demek nêz de wê kelecana li vir dar ketiye, em dixwazin di kongreya PENa Kurd de ku dê li dar bikeve jî bibînin. Careke din em ji ber mazuvaniya Şaredariya Peyasê spasiyên xwe li ser navên nivîskaran dikin û malavahiyê dixwazin.”
Di şeva piştgiriyê de Cîgirê Hevşaredarê Peyasê Yilmaz Guneş jî diyar kir ku ew qîmeteke mezin didin ked û xebata nivîskarên Kurd û got: “Ji bo geşkirina ziman, çand û wêjeya Kurdî wê xebatên me bidomin. Ji bo piştgirî û hevgirtina bi nivîskaran re jî deriyê me her dem vekirî ye. Em ji ber xebatên rewşenbîriyê kêfxweş in”.
Herî dawî nivîskar Hecî Ozkal jî bi zaravayê Kirmanckî axivî û bal kişand ser rewşa zimanê Kurdî û pê re kêfxweşiya xwe ya di vê şevê de ji bo kesên ked dane û nivîskar civandine hev anî ziman û malavahiya Şaredariya Peyasê kir.
Civîn bi girtina wêneyên giştî yê ji bo arşîvê bi dawî bû.
