Wan – Tax û kolanên navçeya Bêgiriyê di bin gilêş û bermahiyan de mane. Beşên paqijiyê yên şaredariyan di bicîhanîna peywira xwe de lawaz dimînin. Şaredariyê diyar kir ku plansaziya wan ji bo paqijiyê heye.
Pirsgirêka paqijiyê ya li navçe û navendan her ku diçe zêdetir dibe. Beşên paqijiyê yên şaredariyan di bicihanîna peywira xwe de lawaz dimînin û karê xwe baş nakin. Her wiha ji ber zêdebûna nufûsê jî qirêjiya li bajaran gihiştiye asta herî jor û ev yek wê siberojê pirsgirêkên mezintir bi xwe re bîne.
Welatî dixwazin hawirdora wan bê paqijkirin
Li navçeya Bêgirî yê ya Wanê jî kolan û tax di bin qirêjiyê de ne û şaredarî di paqijkirinê de kêm dimîne. Welatiyên Bêgirî yê ji vê rewşê nerazî ne û dixwazin tax û kolanên wan bên paqijkirin. Her wiha di encama çavderiyên me de parka li ber bendavê ya bêhnvedan û zarokan jî di nava gilêşî de ne û ev der jî nayên paqijkirin.
Peyarê jî xerab in
Li navçeyê binesaziya gaza xwezayî beriya 3 salan hatiye çêkirin û peyarê xerabe ne. Ev yek jî tevî 3 salên derbasbûyî jî nehatiye çareserkirin û welatî jî divê yekê de bigazinc in.
Şaredarî: Plansaziya paqijiyê heye
Rayedarên şaredariyê ku me bi rêya telefonê xwe gihande wan, destnîşan kirin ku ji ber berfa zêde wan nekariye paqijiyeke berfireh bikin û dan zanîn ku wan ji bo paqijiyê plansaziyek derxistiye. Her wiha rayedaran diyar kir ku parka li ber bendavê jî di destê Kizilayê de ye û paqijiya wê ew dikin. Ji bo peyarêyan jî rayedaran anî ziman ku ji ber di navbera wan û şîrketa gaza xwezayî de tu protokol nîn e, çêkirina peyarêyan jî di berpirsiyariya wan de nîn e.
