Saziyên şoreşger, demokrat, rewşenbîr û pêşvexwaz ên li bajarê Stuttgard û derdora wê ragihandin ku wan Platforma Têkoşîna Li Dijî Komkujiyan ava kirine.
Platform bi armanca naskirina komkujiyên ku beriya niha pêk hatine û têkoşîna li dijî paqijiya etnîkî û komkujiyên roja îroyîn hatiye avakirin. Platformê daxuyaniyek da û di daxuyaniya xwe de diyar kir ku di dîroka mirovahiyê de gelek zilm û komkujî hatine kirin lê belê gel li hemberî vê hovitiyê bê deng nemane û gelan li ber xwe dane. Di daxuyaniyê de îfade kirin ku komkujî ne tenê li ser netew yan jî nasnameyeke diyar tên kirin, di heman demê de êrîşên li hemberî wijdana hevpar û pêşeroja mirovahiyê ne jî û wia got: “Ev pergal bi cezanekirina failan, xelatkirina kujeran û veşartina rastiyan hewl dide hebûna xwe bidomîne. Lê belê em ji bo mezinkirina têkoşîna edaletê li vir in.’’
Divê rû bi rû neyê taloqkirin
Platformê destnîşan kir ku di serî de Komkujiya Ermeniyan a 1915, Pontûs, Koçgirî, Komkujiya Dêrsimê ya 1937-38an, Komkujiya Rûman a 1956an, Mereş, Roboskî, Komkujiyên Girtîgehan ên 19ê Kanûnê û Komkujiya Elewiyên li Sûriyeyê û Xezeyê rûbirûbûna van komkujiyan divê neyê taloqkirin. Platformê bang li civaka navneteweyî kir ji bo naskirina komkujiyan, darizandina berpirsan û tedbîrên li hemberî hewldanên komkujiyan tavilê pêngavên hewce biavêje û diyar kir ku bêdengî tê wateya hevparbûna sûcan.
Di daxuyaniyê de ev daxwaz hatin rêzkirin:
– Divê komkjiyên beriya niha hatine kirin werin naskirin û berpirsiyar werin darizandin,
– Divê civaka navneteweyî têkildarî tedbîrên li hemberî komkujiyan tavilê pêngavên hewce biavêje,
– Bîranîna mexdûrên komkujiyên û piştgirîdayîna kesên jê rizgar bûne,
– Ji bo di nava civakê de hişmendî were avakirin divê perwerdeyên hewce werin dayîn.
Banga piştgirî û têkoşînê
Platforma Têkoşîna Li Dijî Komkujiyan, ji bo piştevanî û têkoşînê bang li raya giştî a navneteweyî, rêxistinên mafên mirovan û kesan kir û peyama ‘’Werim em bi hev re li yahemberî kesên ku dixwazin me ji hev cuda bikin, têbikoşin’’ da.
Gelek saziyên weke Komeleya Li Dijî Komkujiya Dersimê ya 38an (ev), Die Linke, SYKP, Kongreya Avakirinê ya Dêrsimê (DÎK), Federasyona Karkerên Penaber a Elmanyayê (AGIF) Navenda Civaka Kurd a Demokratîk a Stuttgartê, Navenda Elewiyan a Stutgartê û Navenda Çanda Demokratîk (ADHF) di nava pêkhateyên platformê de cih digirin.
