Amed – Nûçegihana şer a Ronahî TV Cûdî Elî der barê xebatên ku di nav şer de dimeşînin de got: “Divê hevalên rojnameger, nûçegihan û kameravan zanibin ku ew di nav şer de têkoşîna zîhnî dikin.”
Ronahî TV ya ku di 21ê Mijdara 2011an de li Ewropayê hat avakirin bi taybetî weşanê xwe ji Qamişlo, Kobanê û Efrînê dikir. Ronahî TV piştî 2017an hemû navendên xebatên xwe derbasî rojavayê Kurdistanê kir. Kanal piştî derbasî Rojava bû, ji taxa Hilêliyê ya bajarê Qamişlo dest bi weşana xwe kir. Piştî pêngavên rizgarkirinên ji DAIŞ’ê, bajarên weke Minbic, Tebqa, Reqa û Dêrezorê jî navend û ofîsên xwe vekirin.
Her wiha Ronahî TV di sala 2021an de stûdyoya xwe ya Hesekê vekir û heta roja îro weşana xwe li wê derê didomîne. Piştî vê yekê bi taybetî karê weşangeriyeke aktuel û zindî bi rêve bibe. Ronahî TV di 21ê Mijdarê de 13emîn salvegera xwe pîroz kir. Ronahî TV niha nûçeyên xwe bi zimanên kurdî (kurmancî û soranî), erebî, îngilîzî û fransî radigihîne.
Nûçegihan û pêşkêşvanên Ronahî TV ji bona ku êrîşên li ser herêmê tên meşandin ragihînin erkek mezin dane pêşiya xwe. Nûçegihana şer a Ronahî TV Cûdî Elî der barê xebatên ku ji roja destpêka avakirinê kirine û bandora ku li ser civakê ava kirine ji Ajansa Welat re axivî.
Cûdî Elî di destpêka axaftina xwe de got ku Ronahî TV ji bo karibe rewşa Şoreşa Rojeva ragihîne hat avakirin û wiha got: “Dema ku ev televîzyon hat vekirin, bi armanca ku karibe bibe televîzyona şoreşê hat avakirin. Ronahî TV di dema şoreşê de hewl da deng û rengê civakê bilind bike û bide xuyakirin. Heta niha jî gav bi gav bi şoreşê re ev televîzyon dimeşe. Çi xebatên ku tên kirin û bûyerên ku rû didin bi awayekî xurt tên ji raya giştî re tên ragihandin.”
Bû dengê neteweyan
Cûdî Elî da zanîn ku Ronahî TV ji bo Şoreşa Rojava bigihîje armanca xwe xwediyê ciheke girîng e û wiha axivî: “Mirov dikare bibêje televîzyona Ronahî TV di warê xuyakirina felsefeya azadiya jinan û her wiha felsefeya Rêber Apo hîn bêhtir derxe holê xebatan meşandiye. Di heman demê de li ser xebatên avakirina civaka demokratîk xebatan meşand. Wek tê zanîn dema xweseriya civaka demokratîk hat avakirin di nav de gelek civakên û netewên herêmê jî cih girtin. Di vî warî de Ronahî TV her netewe bi reng, çand, adet û taybetmediyên wan derxist pêş. Di vî warî de heta roja me ya îro gelek gavên baş jî avêtiye. Ger ku ne ji Ronahî TV bûna ev xebatên ku îro li Bakur û Rojhilatê Suriyeyê dihatin meşandin wê negihabana armanca xwe. Ji ber ku her çiqas xebat bihatana kirin jî ger ew ji gel re nehatina ragihandin dê negihana civakê. Lê Ronahî TV di warê leşkerî, siyasî, civakî û di warê avakirinê de her gav bi şoreşê re meşiya û ragihandinên xwe ji civakê re kir.”
‘Piraniya nûçegihanên Ronahî TV jin in’
Cûdî Elî bal kişand ser rola ragihandinê ya di Şoreşa Rojava de û wiha dirêjî da axaftina xwe: “Em îro lê dinihêrin şoreşa rojavayê Kurdistanê bingehek wê çêbûye û armancên xwe pêk tîne, ew jî em dikarin bibêjin bi saya Ronahî TV ye. Ronahî TV ji şoreşa rojavayê Kurdistanê re bû weke arşîvekî. Dikaribû bi felsefeya ‘Jin Jiyan Azadî’ herwiha bi îdeolojiya Rêber Apo civaka ekolojîk û demokratîk ku lingên şoreşê yên bingehîn were dayîn. Hin armancên wê pêk hatin ji bo hin armanc jî pêk werin hê xebat didomin.”
Cûdî Elî di axaftina xwe de bal kişand ser rewşa Rojhilata Navîn a heyî û wiha pê de çû: “Dema ku em bala xwe bidinê îro li hemû Rojhilatê Navîn şer heye û tim di nav aloziyeke de ye. Em weke nûçegihanên jin û ciwan xebatên xwe çawa didin meşandin? Di qada nûçegihaniya şer de hevalên ku beriya me di qadên şer de li dijî DAIŞ’ê cihên xwe girtin ji bo me bûn mînak. Em hevalên ku di vî şerê de şehîd bûn û mohra xwe li vê şoreşê dan wek pêşengên xwe dibînin. Ji ber vê jî elbet çiqas zehmetî, astengî hebin, her roj li dijî rojnamegeran êrîşên hovane pêk werin jî em paşve gav navêjin. Berojî vê di her bûyereka ku pêk tê de wek nûçegihan bi taybet jî wek nûçegihanên jin cihê xwe di nav şer de digirin. Jixwe piraniya nûçegihanên Ronahî TV yê jî jin in. Çi bûyereke li ku çêbibe ew nûçegihan li wir e û bûyerê bi awayekî yekser radigihîne.”
‘Em xwedî mîrateyeke mezin in’
Cûdî Elî di berdewamiya axaftina xwe de wiha got: “Di Rojhilata Navîn de cihê ku herî pir şer lê tê meşandin rojavayê Kurdistanê ye. Ji ber ku di sala 2011an de şoreşa rojavayê Kurdistanê dest pê kir hetanî vê kêlîkê jî tu êrîş li dijî Rojava ranewestiya ne. Şerê çeteyê DAIŞ û CEBETIL NÛSRA û herî dawî ku şerê Dewleta Tirk hê jî berdewam dike. Qada ku herî zêde êrîş lê tên kirin ev der e. Lê dîsa em lê dinihêrin tevî ewqas êrîş û rewşa heyê nûçegihana xwe kiriye rewşa awarte. Her bi vê rewşê re bûne yek çi êrîşên ku pêk tên cihê xwe di nav de digirin. Bi her awayî hewl didin bi pênûs, nûçe û kameraya xwe ku bikaribin bi her awayî vê yekê ragihînin ji raya giştî ya cîhanê re.”
Cûdî Elî bi van gotinan dawî li axaftina xwe anî: “Soza me ew soze ku me daye hevalên me yên şehîd. Gelek hevalên me yên rojnameger ên şehîd hene. Di her qadê de şopên wan hene, ji me re mîrateyeke mezin hiştine. Em hê bêhtir dikarin xwe li pêş bixin û li ser mezin bikin. Ev mîras têrî me yî sedsalan dike. Hêvî û daxwazên min ji hevalên me yên rojnameger ew e ku xwe di vî warî de li pêş bixin. Divê hevalên rojnameger, nûçegihan û kameravan zanibin ku ew jî di nav vî şerê de têkoşîna zîhnî dikin. Ez dixwazim vê zîhniyeta desthilatdar ku timî berovajî bi me dide nîşandan em jî weke kurd xwe bi xwe bidim îspatkirin, çand, ziman, hebûn û nasnameya xwe ku em dikaribin di rêya vê çapemeniya azad de derxînin holê. Bi taybet banga min ji jinan ew e ku bikaribin di qada xwe de bi reng, deng û bi taybet jî şoreşa rojavayê Kurdistanê ku bûye şoreşa jinan ragihînin.”
