Rêveberiya Xweseriya Demokratîk a Herêma Bakur û Rojhilatê Sûriyeyê û PYD ji ber êrîş û ambargoya li ser taxên Kurdan ên li Helebê hikûmeta demkî ya Şamê hişyar kirin.
Rêveberiya Xweseriya Demokratîk a Herêma Bakur û Rojhilatê Sûriyeyê û Partiya Yekitiya Demokratîk (PYD) der barê êrîşên ku komên girêdayî hikûmeta demkî ya Şamê li dijî taxên Şêxmeqsûd, Eşrefiye û Benî Zêdê de daxuyanî dan.
Berfirehiya daxuyaniya Rêveberiya Xweser wiha ye:
Rêveberiya Xweseriya Demokratîk a Herêma Bakur û Rojhilatê Sûriyeyê bi tundî dorpêça li ser taxên Şêxmeqsûd û Eşrefiyê yên Helebê, binpêkirin û êrişên li dijî welatiyan ku di encamê de şehîd çêbûn û hejmarek welatî birîndar bûn şermezar dike. Ev binpêkirina zelal a qanûnên navneteweyî û mirovî ye, bi awayekî rasterast ewlehî, rûmet û mafên welatiyan a jiyana ewle hedef digire.
Ev pêkanînên bêberpirsiyar dibin sedema parçebûna hêzên neteweyî yên Sûriyeyê û bi awayekî zelal nebûna cidîyetê ji aliyê hikumeta demkî ya Sûriyeyê ve di hewldanên wê yên ragihandî de ji bo yekgirtina gelê Sûriyeyê û avakirina dewleteke demokratîk nîşan dide, ku hemû welatî bêyî cûdahî xwedî maf bin.
Em diyar dikin ku berdewamkirina dorpêçê û binpêkirinan, li kêlek wê rageşî û tundiya bêrewa û derqanûnî her hewldaneke rastîn a çareserkirina nakokî û pirsgirêkên asî di nava Sûriyeyiyan de asteng dike, dibe hêmaneke bingehîn a gihandina çareseriyên siyasî yên berfireh û mayînde ji bo krîza Sûriyeyê, bêîstîqrarî û parçebûnê zêde dike.”
Rêveberiya Xweser hişyarî li ser berdewamkirina vê metoda rageşiyê da ku, wê bi xwe re bandorên xerab li ser tevahî Sûriyeyê û xeteriyên berfirehkirina xelak tundiyê û parçebûnê di nava pêkhateyên civaka Sûriyeyê de bîne.
Rêveberiya Xweser hişyarî li ser berdewamkirina xîtaba kîndariyê û cûdahiyê da, ku bi xwe re bandorên wêranker li ser mozaîka civaka Sûriyeyê tîne. Ev siyaset û pêkanîn dikevin xizmetî projeyên parçebûnê, em vê bi giştî red dikin û weke gefekê li dijî yekkitiya Sûriyeyê dibînin.
Rêveberiya Xweseriya Demokratîk ji kêliyên destpêkê yên krîza Sûriyeyê ve diyar kir ku Sûriye mozaîka Rojhilata Navîne, di nav de netewe, ol, mezheb û gelek çand hene û çi çareseriyeke rasteqîn li Sûriyeyê bêyî lihevkirina civaka Sûriyeyê bi tevahî pêkhateyên wê, pêk nayê.
Rêveberiya Xweser di dawiyê de bang kir ku tavilê dorpêçê, êrîş û binpêkirinan bi dawî bikin, berpirsên wan ceza bikin, vegerin mentiqê diyalog û lihevkirinan, xwe bispêrin çareseriyên siyasî yên demokratîk ku mafên tevahî Sûriyeyiyan misoger dike, rê li pêş avakirina Sûriyeyeke demokratîk a nenavendî vedike ku tê de edalet, wekhevî û jiyana hevbeş heye.
PYDê diyar kir ku ew bi fikareke mezin binpêkirinên berdewam ên li dijî şêniyên taxên Şêxmeqsûd û Eşrefiyê, kiryarên bêberpirsiyarî û rêbazên hovane yên komên girêdayî hikûmeta demkî pêk tînin, dişopîne.
Armanca van êrişan guhertina demografîk e
Di daxuyaniya PYDê de hat diyarkirin ku siyaseta qetilkirin û koçberkirinê ya sîstematîk ku ev kom pêk tînin berdewama metoda hedefgirtin û guhertina demografîk a li dijî gelê Kurd nîşan dide.
PYDê di daxuyaniya xwe de anî ziman ku berdewama dorpêçê û girankirina wê ji hêla hikûmeta demkî ve rasterast krîzên mirovî zêde dike, nexasim li gel kêmbûna giran a sotemeniyê, xurdemenî û madeyên bingehîn. Ev hişyariyê li ser pêkanîna karesateke mirovî ya rastîn nîşan dide, bi taybet bandorê li ser zarok, jin û pîran dike.
Di daxuyaniyê de hat gotin ku divê tevahî rêxistinên hiqûqî, qanûnî û mirovî berpirsiyariyên xwe yên elxaqî û qanûnî li hember binpêkirinên li dijî şêniyên taxên Şêxmeqsûd û Eşrefiyê tên kirin, rabin û wan taxan biparêzin. Her wiha hikûmeta demkî li ser nepêkanîna rakirina dorpêçê hat şermezarkirin.
PYDê di dawiya daxuyaniyê de da zanîn ku diyalog û berdewama wê bijarteya bingehîn û çareseriya guncaw a rizgarkirina peymana 10ê Adarê ye, her wiha banga pabendbûna bi peymana 1ê Nîsanê hat kirin.
