MKGê, DFGê û ÎHDê têkildarî lêferzkirina sîxuriya li rojnameger Dîlan Kartal daxuyanî dan û xwestin derheqê van polîsan de lêpirsîn bê destpêkirin û Çapemeniya Azad dê tu carî dev ji rastiyan bernede.
Rojnameger Dîlan Kartal 21ê Adarê roja Newroza Amedê ji aliyê polîsan ve bi îdiaya ku “Ala Kurdistanê” hildaye ji aliyê polîsan ve tê sekinandin û polîsan gefa binçavkirinê lê dixwin. Polîs jê re dibêjin, “Niha hewce ye em te bikin binçavan, lê em te nakin binçavan, were em hinekî sohbet bikin.” Piştre jî polîs peyaman jê re Dîlan Kartal re dişînin û daxwaza sohbetê li gel wê dikin. Herî dawî polîs 16ê Nîsanê rêya Dîlan Kartal digirin û dixwazin li gel wê sohbetê bikin.
Dîlan Kartal li dijî van gef û tacîzên polîsan serî li Komeleya Mafê Mirovan(ÎHD) a Şaxa Amedê da û daxwaza piştevaniya hiqûqî kir. Piştre Komeleya Rojnamegerên Jin a Mezopotamyayê(MKG), Komeleya Rojnamegeran a Dîcle Firatê (DFG) û Komeleya Mafê Mirovan (ÎHD) li avahiya komeleyê civîna çapemeniyê li dar xistin.
‘Gere polîs bên darizandin’
Di civînê de ewilî Serokê ÎHDa Amedê Ercan Yilmaz axivî û diyar kir ku piştî îlankirina OHALê ya sala 2016an polîs bi rêyên nefermî bi welatiyan re têkilî datînin û ajantiyê li wan ferz dikin. Yilmaz wiha got: “Li gorî raporên ÎHDê yên sala 2024an bi 87 welatiyan re bi vî awayî têkilî hatiye danîn. Îro jî em ji bo rojnameger Dîlan Kartal li vir in. Dîlan Kartal jî rastî vê rewşê hatiye. Em bangî Walitiya Amedê û Mudiriyeta Polîsan dikin, gere di derheqê van polîsan de lêpirsîn bê destpêkirin.”
‘Çapemeniya Azad tu carî bêdeng nabe’
Pişt re rojnameger Dîlan Kartal axivî û diyar kir ku polîs dixwazin rojnamegeriyê krîmînalîze bikin û got: “Di van salên dawiyê de li ser ciwanên Kurd, rojnamegerên Kurd polîtîkayên qirêj zêde bûn e. Ez jî wek rojnamegerekê bi van polîtîkayan re rû bi rû mam. Dixwazin bi van polîtîkayan denge heqîqetê qut bikin, lê tu carî nikarin dengê heqîqetê qut bikin. Dê Çapemeniya Azad tu carî bêdeng nebe.”
‘Rojnamegerên jin dikin hedef’
Pişt re Seroka MKGê Roza Metîna axivî û diyar kir ku desthilat ji bo ku pêşiya heqîqetê bigire serî li van polîtîkayan dide û ev yek anîn ziman: “Taybetî rojnamegerên jin dixe hedef û dixwaze dengê jinan qut bike. Îro jî em ji bo endama komeleya xwe, hevala xwe Dîlan li vir in. Em li hember van êrişan tu carî hevalên xwe tene nahêlin, em ê her tim li pişt wan bin, em van êrişan qebûl nakin, pêwist e êrişkar bên cezakirin.”
