Stenbol – Endamê Desteya Serokatiya PYDê Salîh Muslîm tekildarî Konferansa Yekrêziya Kurd anî ziman ku konferans bi taybet ji bo Rojava ye lê dê bandorê li tevahiya Kurdistanê bike.
Bi beşdariya partî û rêxistinên Başûr, Bakur û Rojavayê Kurdistanê di 26ê Nîsanê de li Parqa Azadî ya bajarê Qamişlo ya Bakur û Rojhilatê Sûriyeyê Konferansa “Yekrêzî û Yekhelwesta Kurdî li Rojavayê Kurdistanê” hat li darxistin. Di encamnameya konferansê de li ser ziman û çanda Kurdî hat rawestandin û ji bo di navbera aliyê peywendîdar re dan û standin bê kirin biryara ava kirina komîteyekê hat girtin. Encamnameya Konferansê hem ji bo Kurdan û hem jî ji bo Suriyeyê bû. Di encamnameya konferansê de tê destnîşan kirin ku mafê hemû gelên Suriyeyê bên mîsogerkirin û zimanê Kurdî jî weke zimanê Erebî bibe zimanê fermî. Ji bo partiyên Kurd jî tê destnîşan kirin ku partiyên Kurd di pêşeroja Suriyeyê de ji bo mafê gelê Kurd bi yekrêziyê tevbigerin.
Endamê Desteya Serokatiya Partiya Yekitiya Demokratîk (PYD) Salîh Muslîm ku tev li konferansê bûbû encamnameya konferansê û bandora wê ji Ajansa Welat (AW) re nirxand.
‘Kedeke mezin hat dayin ji bo konferansê’
Salîh Muslîm bi lêv kir ku geşedanên li Rojhilata Navîn diqewimin pêwîstiya yekitiya Kurd derxistiyê holê û wiha got: “Zêdetirî 2 sal in geşedanên girîng di Rojhilata Navîn de diqewimin. Kurd jî bûn navenda van bûyeran. Vê yekê pêwîstiya yekitiya netewî ya Kurd zêdetir kir. Kurdan jî ispat kir ku gelekî zindî ye û dikarê tiştan bi pêş bixîne û nirxên Kurdan jî ne nirxên li dijî mirovahiyê ye. Di encama van bûyeran de em jî weke hemû hezên Kurdan gehiştin hevdû. Ji bo yekitiya Kurdan çêbibe komîte werin avakirin. Hemû Kurd jî ji vê yekê kêfxweş bûn. Naveroka konferansê ji bo Rojava ye lê ji her çar aliyên Kurdistanê partî tev li konferansê bûn. Taybet ji bo Rojava bû lê bandora konferansê wê li tevahiya Kurdistanê bike. Peyamên gelekî erênî derketin. Heviyên me jî zêde bûn. Kedeke mezin hat dayîn ji bo konferansê. Gelek şehîd hatin dayîn. Ji ber ku karê me gihiştin encamê em kêfxweş bûn. Hestên me hemûyan bi vî rengî bû.”
Kongreya yekitiya Kurdan
Di berdewama axaftina xwe de Salîh Muslîm destnîşan kir ku ji niha şûnde divê kongreyeke netewî ya Kurdan be li darxistin û wiha dirêjî da axaftina xwe: “Armanca vê konferansê ew bû ku pêwîstiyên Kurdan, mafê Kurdan çawa bên dayîn û bistînin. Dê li ser peymana 8 xalan ku birêz Mazlûm Abdî bi Colanî re îmze kirin jî bandora wê hebe. Ji aliyê din ve jî ji aliyê aborî, parastina ziman, çand, parastina rewa ve jî çi xal hatibin gotin li ser xebat bên kirin. Komîteyên hatinê ava kirin li gor biryarên ku konferansê hatine girtin bixebitin. Ji niha şûnve jî tevahî saziyên Kurdistanê yên ziman, çand û hemû saziyan jî bigihin hevdû ku em bikarin kongreyeke neteweyî ya Kurdan çêbikin. Yanî Kurd her çar aliyên Kurdistanê çawa dikarin bi hevdû re bidin û bistînin, çawa dikarin desthilatdariya wî welatî re bidin û bistînin li ser vê yekê bixebitin. Ew jî xebateke cuda ye. Ji berê jî hinek hewl dan jî çêbûn. Di sala 2013an de li Hewlêrê çêbû. Lê hinekan ew yek pêk neanîn û neçû serî. Em hevî dikin ku ev pêvajo jî were temamkirin û xebatên me ji niha şûn ve li ser vê astê bimeşe.”
‘Divê hesap bê pirsîn’
Salîh Muslîm bi lêv kir ku divê ji partiyên li gor biryarên konferansê tevnegeriyan hesap bê pirsîn û ev tişt gotin: “Me di konferansê de biryara komîteyekê girt. Ev komite wê hevbeş bibe. Heke şaştî hebin bi demê re wê ew komîtê serêrast bike. Bi heza gelê me yanî gelê me biryarek dabe divê em jî giredayî wê bin. Divê gel hakem be. Yekitiya gel jixwe çêbû ye. Lê yên ku ne yekitiyê de ne partiyên siyasî ne. Hinek partiyên siyasî li gor berjewendiyên malbatî tevdigerin. Ew yek dibe asteng pêşiya yekitiya Kurdan. Divê yên ku li dijî yekitî û berjewendiyên gel tevgeriyan hesab jê bê pirsîn. Her partî divê karê xwe bike. Ew jî beriya her tiştî divê hişmendî bê guhertin. Cudahiyên me zêde ne. Cûdahiyên me yên olî û bawerî û hwd. Lê divê em formulekê bibînin ku tevî cûdahiyan em bikarin bi hevdû re bijîn. Divê gelê me jî tebigihêjê û ji partiya re nehêlê. Divê em çanda jiyana hevbeş di nava gel de biçînin û qasî ku karîn jî berfireh bikin.”
Di dawiya axaftina xwe de Salîh Muslîm bal kişand ser rola Kurdan a di Rojhilata Navîn de û axaftina xwe wiha qedand: “Li her aliyê Kurdistanê divê hemû Kurd bizanibin rewş guheriye. Gelê Kurd hişyar bûye û di Rojhilata Navîn de pêşengiya demokrasiyê dike. Damezrandina yekemin a mirovahiyê Mezopotamya bû. Kurdan rolek lîst. Niha careke din ew rola Kurdan tê xwestin. Ji bo wê jî divê em ji aliyê zanistî, fikir, hişmendî û siyasî ve amade bin ku bikarin pêşengî bikin.”
