Yek ji damezrînêr û Serokê Şaxa Kurdî Dera Edeneyê yê berê, Îsa Bûlût jiyana xwe ji dest da.
Yek ji damezrînêr û Serokê berê yê Şaxa Kurdî Dera Edeneyê ku bi Biryarnameya di Hukmê Qanûnê de (KHK) hate girtin, Îsa Bûlût li Nexweşxaneya Bajêr a Edeneyê ku ji ber nexweşiya penceşêrê dihat dermankirin duh jiyana xwe ji dest da. Cenazeyê Îsa Bûlût li Goristana Kuçukoba ya navçeya Seyhan a Edeneyê hate veşartin.
Gelek nûnerên partiyên siyasî û saziyên sivîl ên civakî tev li merasîma cenazeyî bûn. Ji bo Îsa Bûlût îro li ber mala wî ya li taxa Ova ya semta Şakîrpaşa ya Edeneyê mewlîd hate dayîn.
Mamoste Îsa Bûlût dema ku Kurdî Der di sala 2011an de hat damezirandin bû serokê wê û sê salan serokatiya komeleyê kir. Heta ku Kurdî Der hat girtin jî di rêveberiya komeleyê de cih girt û xebata xwe ya perwerdeya ziman û çanda kurdî, hem li komeleyê hem jî li gelek taxên Edeneyê berdewam kir. Yek ji hevalê Îsa Bûlût, Giyasettîn Gumuş ku bi hev re di Kurdî Derê de rêveberî û mamostetî kirin diyar kir ku Mamoste Îsa Bûlût mirovekî bîrewer û şareza û gelekî durist bû û wiha got: “Berî sazkirina kurdî derê jî li gelek ciyan xebatên siyasi meşandibûn û çendîn caran hatibû girtin û di zindanê de jî hatibû ragirtin. Serê malbata wî û hevalên wî yê Kurdî Derê û kurdî hezan sax be.”
