Şaredariya Bajarê Mezin a Amedê nêzî du salan e hê jî hewl dide bermayiyên qeyiyamn li pey xwe hiştiye çareser bike. Tevî hewldanê şaredariyê jî hê jî gelek kêmasiyên di warê xizmetguzariyê li bajêr de hene û welatiyên Amedê ji ber van kêmasiyan ji şaredariyê bi gazinc in.
Şaredariya Bajarê Mezin a Amedê ji Mijdara sala 2016an heta Nîsana 2024an bi destê qeyiman hatibû birêvebirin. Qeyiman gelek bêûsliyên û diziyan li li şaredariyê kiribûn. Her wiha qeyiman xizmetek têr û tije û bi dilê gel nekir. Tevî ku qeyiman dizî dikir û xizmetguzariyê ji gel re nedikirin lê ji wezîfeyê jî nedihatin girtin û derbarê wan de tu lêpirsînek nehat destpêkirin. Hê jî gelek bermayiyên qeyiman li bajêr ji holê nehatine rakirin û rûxandina ku qeyiman kiribû niha ji aliyê Şaredariya Bajarê Mezin a Amedê ku di bin rêveberiya DEM Partiyê de ji holê tê rakirin.
Di Hilbijartina Xwecihî ya Adara 2024an de DEM Partiyê bi rêjeyek mezin dîsa bi ser ket û ev nêzî du salan e her çiqas hewl dide pirsgirêkên li bajêr çareser bike û xizmetguzariyê ji bo gel bike jî lê belê kêm dimîne. Li Amedê û li gelek navçeyên wê yên navendî li gelek deveran peyarê û cihên ku erebokên zarokan nikarin têde bimeşin hê jî xerabûyînê û nayên çêkirin. Parka Rojava ya li navçeya Peyasê 8 meh in şaredarî çêkirina wê daye îhaleyê lê ev tevî ewqas dem derbas bû jî hê jî park nehatiye çêkirin. Welatiyên ku dikanên wan nêzîkê parkê ne ji vê rewşê gelek bi gazinc in. Di heman demê de ew xêzên ku li ser peyarêyan in, ji bo ku kesên astengdar li serê biçin û bên hê jî nehatine çêkirin.
Dar ji cihê wan hatine rakirin
Her wiha li Cadeya Yenîyolê ya ji Xaçerêya Kantarê ku heta semta Dîclekentê diçe, ev çend meh in çêkirina wê bi dawî nebûye. Beriya ku ev cade were çêkirin gelek dar lê hebûn û ev dar hatine rakirin û hê jî dar nehatine çandin. Li gorî gotinên welatiyan darên hatine rakirin birine Parka 75an a li navçeya Peyasê.
Ji ber van kêmasiyan welatiyên Amedê bi gilî û gazinc in û banga çareserkirina van kêmasiyan li şaredariyê dikin.
Welatî bi gazinc in
Welatiyên ku nexwest in navên xwe bidin anîn ziman ku du sal in şaredarî ketiye destê DEM Partiyê lê hê jî kar û xebatên xwe bi rêk û pêk nekirine û gotin: “Li taxa me 8 meh in şaredarî dest bi çêkirina parkê û peyarêyan kiriye, lê hemûyan jî wisa nîvco hiştiye û naxebitin. Li ser pêyarêyan ne erebokên zarokan têne ajotin û ne jî kesên astengdar nikarin bimeşin. Gelek caran erebeyên ku li ser cadeyê de diçin, em ji ber dûmana wan nikarin deriyên dikanên xwe vebikin. Dema ku dibe zivistan jî her der dibe herî û qirêjî dibe. Her dema ku ev peyarêyên ku têne çêkirin jî li ser hemûyan toza betonê rijandine. Ew hemû jî dibe asbest. Ev asbest jî hemû dibe sedema nexweşiyan.
Ji ber xebat nîvco maye, dikanên me hatine dagirkirin. Ne welatî dikarin bi hêsanî bimeşin û ne jî dikarin zarokên xwe derbixin derve. Em gelek caran bi vê rezaletiyê re rû bi rû dimînin. Lê mixabin tu kes dengê me nabihîze. Em çend caran çûn şaredariyê jî ji me re dibêjin ‘ha vê hefteyê ha hefteyek’. Ev 8 meh bi ser re derbas bûn hê jî neqediyaye. Rewşa ku niha em têde ne, ne tu rewş e. Em daxwaz dikin ku demildest şaredariya me van pirsgirêkan çareser bike da ku em ji vê rewşê xelas bibin.”
Ji ber rûxandinên qeyiman xebat têr nake
Têkildarî mijarê me xwe gihand Midûriyeta Karên Fenê ya Şaredariya Peyasê û Şaredariya Bajarê Mezin a Amedê. Her du şaredariyan jî gotin ku ev du sal in ew xizmetguzariya dikin lê ji ber kêmasî û rûxandinên qeyiman xebata dikin jî têr nake. Şaredariyan diyar kir ku gilî û gazinc in welatiyan mafdar dibînin û ew ê hewl bidin di demek nêzik de pirsgirêkan çareser bikin.
