Amed– Welatiyên ku tev li Newroza Farqînê bûn destnîşan kirin ku ji bo aştiyek demokratîk pêş bikeve divê di serî de girtîgeh vala bibin û gotin: “Pêwist e Rêber Abdullah Ocalan û girtiyên siyasî bêne berdan”
Newroza îsal bi dirûşma “Rêbertiya Azad, Civaka Demokratîk” tê pîrozkirin. Gelê Kurd her qada Newrozê dike qada azadiyê. Welatiyên ku tev li Newroza Farqînê bûn têkildarî banga Rêberê Gelê Kurd Abdullah Ocalan a “Aştî û Civaka Demokratîk” û Newrozê ji Ajansa Welat (AW) re axivîn.
‘Em dixwazin şer bê rawestandin’
Welatî Elî Tanercî diyar kir ku Newroz ji bo gelê Kurd gelek giring e û got: “Gelê Kurd yên ku di nav çar dewletan de hatine parçekirin, Newroz ji bo wan wateya wê yekîtiya gelê Kurdistan ê ye. Em wekî gelê Kurd her tim azadiyê dixwazin. Em şer naxwazin. Em dixwazin tevahî cîhan Newrozê bibîne ku gelê Kurd azadîxwaz e. Em dixwazin şer bê rawestandin. Em dixwazin azad bijîn. Bila gelê Kurdistanê bibe yek û şer bi dawî bibe.”
‘Girtiyên siyasî berdin’
Welatî Bahattîn Yazicî jî anî ziman ku ji bo pêvajo pêş bikeve pêwiste dewlet gavan bavêje û wiha got: “Di serî de pêwist e ku girtiyên siyasî tevahî bên berdan. Eger girtiyên siyasî neyên berdan pêvajo nameşe. Dewlet dibêje bila PKK çekan berde. Lê yek alî nabe. Em ê her tim li pişt daxwazê xwe bin. Newroz cejna gelê Kurd e.”
‘Em dixwazin xwîn neyê rijandin’
Welatî Aslan Demîr jî diyar kir ku ew ji bo aştiyê beşdarî pîrozbahiya Newrozê bûne û got: “Ji bo gerila jî û leşker jî neyên kuştin em hatine beşdarî Newrozê bûne. Em dixwazin xwîna ku bi salan tê rijandin êdî neyê rijandin. Pêwist e dewlet gavan biavêje. Ev gav ne tenê ji bo me ji bo tevahiya gelê Tirkiyeyê gelek giring e. Pêwist e girtî bêne berdan û em tev bi hevre azad bijîn.”
‘Divê Abdullah Ocalan azad bibe’
Welatî Abdullah Ozer jî bi destnîşan kir ku gelê Kurd her sal dadikevin qadan û got: “Newroz cejna gelê Kurd e. Îro em hatina li vir cejna xwe pîroz bikin. Pêwîst e em li ziman û çanda xwe xwedî derbikevin. Ji bo banga Rêberê Gelê Kurd Abdullah Ocalan Newroza îsal gelek giring e. Pêwîst e birêz Abdullah Ocalan azad bibe. Dewlet hej jî gav neavêtiye.”
‘Em dixwazin azad bijîn’
Welatî Kudbettîn Çorak jî bal kişand ser giringtiya Newrozê û wiha got: “Newroz çanda kurdan a dîrokî ye. Agire Newrozê ji bo gelê bindest e. Cejna gelê Kurd e. Newroza îsal dê bibe Newroza azadiyê. Rêberê me bang kiriye pêwîst e dewlet jî li gorî vê gav biavêje û guh bidê daxwazê gele Kurd. Gav avêtin yek alî nabe. Divê devlet jî gavan biavêje. Em dixwazin azad bijîn.”
