Amed – 9emîn Pêşengeha Pirtûkan a Amedê berdewam dike. Xwîneran xwestin ku her Kurdek biçe fûarê weşanên Kurdî nas bikin û pirtûkên Kurdî bistînin û bixwînin.
9emîn Pêşengeha Pirtûkan a Amedê ku bi hevkarîya Şaredariya Bajarê Mezin a Amedê , DTSO, TUYAP Fûarcilik û YEW-KURDê (Yekîtiya Weşangerên Kurd) di 18ê Cotmehê de li Navenda Fuarê ya Mezopotamyayê ya li navçeya Bajarê Nû ya Amedê dest pê kir, di roja çaremîn de berdewam dike. Xwînerên ku tev li pêşengeha pirtûkan bûn, têkildarî pêşengehê û girîngiya xwendina Kurdî ji ajansa me re axivîn.
‘Bila her Kurdek wêşanên Kurdî nas bike û Kurdî bixwîne’
Xwînera bi navê Solîn Peyman ji ber lidarxistina pêşengeha pirtûkan kêfxweşiya xwe anî ziman û wiha got: “Ji bo me xwînerên Kurdî keyfxweşiyeke mezine ku dema li pêşengeha pirtûkan li ser standan weşanên Kurdî dibînim. Hewce ye ku di fûaran de ev stand û xebatên Kurdî hebin. Ez dixwazim her Kurdek were fûarê û weşanên Kurdî nas bike, bixwîne bi nivîskar û helbestvanan re sohbet bike. Derheqê zimanê Kurdî de pêşniyar û pirtûkan bigirin.”
‘Zimanê Kurdî gihiştiye qonaxeke baş’
Xwînerê bi navê Dilbirîn Dilo jî li ser weşanxaneyên Kurdî û pêşketina pirtûkên Kurdî axivî û wiha got: “Nêzî 30 weşanxaneyên Kurdî li fuarê cih digirin, ev jî bo me cihê keyfxweşiyêye. Lê em hê jî negihîştine wê astê ku zimanê Kurdî li bajarên Kurdistanê bibe zimanê sereke. Em di hêla zimanê Kurdî de gihiştine qonaxeke baş le hêj jî kêmasî hene.”
‘Ez ji bo pirtûkên Kurdî hatim fûarê’
Xwîner Şêxmûs Ozpolat jî derbarê eleqeya ciwanan a kêm de nêrînên xwe wiha anîn ziman: “Ez jî îro ji bo pirtûkên Kurdî hatim fuarê. Tevlibûn li gorî her du rojên destpêke îro kêm e û ez bawerim ber bi êvarî ve wê geştir bibe. Daxwaza min jî ew e ku geştir bibe. Weşangehên me ji hêla aboriyê ve tengasî dikişînin, hêvî dikim xwîner zêde bibin ku pirtûkên nû werin çap kirin. Lê mixabin pirtûken Tirkî balê dikişînin û kirîn û firotina wan zêdetir çêdibe. Bawer dikim pirtûkên Kurdî jî bi vî awayî werin firotin dê ji hêla aboriyê ve rewşa wan baştir bibe. Min dît ku bala ciwanan ne li ser pirtûkên Kurdî ye û bi rastî tevlibûna ciwanan ewqas zêde nîne îro.”
‘Bila zarok pêşî fêrî Kurdî bibin’
Xwîner û dayîk Berfîn Yerger jî bi lêv kir ku ji bo keça xwe ya 3 salî hatiye pêşengeha pirtûkan û wiha got: “Ez îro bi taybetî jî ji bo pirtûkên Kurdî hatim fûarê. Keça min di 3 saliya xwe de fêrî çi bibe ew jê re baş e. Bila di zarokatî de fêr bibe ku fikrên wê jî baş bibin. Dikare biçe dibistanê hînî Tirkî bibe lê bila pêşî fêrî Kurdî bibe.”
