Şirnex – Xebatkarên tendûristiyê Şeyhmus Dursun, Eyûb Ergen û Abdulaziz Yural ên di qedexeyên derketina derve yên Cizîrê de hatin kuştin, ji aliyê malbat û hevalên xwe ve li ser gora xwe hatin bibîranîn.
Ajokarê ambûlansê Şeyhmus Dursun, hemşîre Eyûb Ergen û xebatkarê tenduristiyê Abdulaziz Yural ên ku di navbera 2015-2016an de li navçeya Cizîrê ya Şirnexê di qedexeyên derketina derve de hatibûn kuştun, li ser gorên xwe yên goristana Esrî ya Cizîrê hatin bibîranîn. Hevserokê Giştî yê SESê Siddik Akin, nûnerê TUM-BEL-SENa Amedê, şaxên SESê yên Amed, Mêrdîn, Stenbol, Balikesîr, Riha, Êlih, Sêrt Şaxên SES, Rêxistinên DEM Partiyê yên Şirnex û navçeyên wê, Parlamentera DEM Partiyê ya Şirnex Newroz Uysal Aslan, Şaxên Şirnexê yên Komeleya Mafên Mirovan (ÎHD) û Komeleya Hiqûqnasan ji bo Azadiyê (OHD) û malbatên xebatkarên tenduristiyê yên hatin kuştin tevlî bîranînê bûn.
Bîranîn bi deqeyek rêzgirtinê destpê kir. Piştre ji bo xebatkarên tenduristiyê yên hatin kuştin dua hatin xwendin. Piştre hevserokê SESê yê Şaxa Şirnexê Samet Kaya axivî û diyar kir ku ew ê bîranînên kedkarên tenduristiyê yên hatin kuştin zindî bihêlin û got: “Her yek ji wan dema xizmeta tenduristiyê pêşkêşî gelê xwe kirin jiyana xwe ji dest dan. Bîranîn ne tenê bîranînek e, di heman demê de îradeya avakirinê jî nû dike.”
‘Em ê têkoşîna aştiyê mezin bikin’
Hevserokê Giştî yê SESê Siddik Akin jî anî ziman ku kedkarên tenduristiyê ji bo xizmeta tenduristiyê bidin gel canê xwe feda kirine û ev tişt got: “Her hevalekî me xwedî taybetmendiyên gelekî cuda bûn. Lê taybetiyên wan ên hevpar dilsoziya bi gelê xwe re û daxwaza wan a aştiyê bû. Ji bo zarok bê dayik û bê bav nemînin em têkoşîna xwe dimeşînin. Ji ber vê yekê çalakiya herî baş ku em dikin, çalakiya mafê jiyanê ye. Em dibînin ku dema hevalên me dikujin, bi zanebûn hatin hedefgirtin. Ev êrîş ji bo astengkirina têkoşîna me ya aştî azadî, tenduristî û demokrasiyê bû. Em li vir rexnedayina xwe didin ku me nekarî bi hev re wan astengiyan rakin, bi sedan kes di jêrzemînan de hatin kuştin. Me nekarî xwe bigihînin cenazeyên wan jî. Kêmasiya me ya herî mezin ev e. Me soz da hevalên xwe ku em ê cihekî ku vê yekê bizane, lê bêyî ku tu carî ji têkoşînê veqetin têkoşîna aştiyê bilind bikin. Em ê têkoşîna aştiyê mezin bikin.”
Piştre Sekretera Giştî ya KESKê Sevgî Yilmaz axivî û bal kişand ser têkoşîna kedkarên tenduristiyê yên hatin kuştin û got: “Hevalên me Eyûb, Şehmus û Azîz weke xebatkarên tenduristiyê erka xwe bi cih anîne. Nasnameya vî gelî, erdnîgariya xwe parastine û erka xwe bi cih anîne. Em di asteke pir krîtîk re derbas dibin. Em di serdemeke wisa re derbas dibin ku hêviyên aştiyê careke din zindî dibin. Weke rêxistinên kedê em amade ne ku di vê pêvajoyê de çi bikeve li ser milê me em ê bikin.”
‘Pêvîstiya me bi aştiyê heye’
Herî dawî Parlamentera DEM Partî ya Şirnexê Newroz Uysal Aslan axivî. Newroz Uysal Aslan bilêv kir ku divê têkoşîna kedkarên tenduristiyê bê mezinkirin û got: “Pêwîstiya me bi aştî û çareseriyê heye. Heta niha Kurdan berdêlên mezin dan. Hîna jî didin. Ya ku dikeve ser milê me ew e ku em têkoşîna aştiyê mezintir bikin. Îro ne roja ku em reş girê bidin. Îro roja ku mîrateya têkoşîna aştiyê ku van hevalan ji me re hiştiye, em mizgîniya aştiyê bidin.”
Bîranîn bi danîna qurnefîlan a li ser goristanê bi dawî bû.
