Li Bolîvyayê dema balafireke leşkerî ket, panzdeh kes mirin û herî kêm 30 kes jî birîndar bûn. Her wiha pereyên di balafirê de li seranserê kolanê belav bûn.
Li gorî raporên televîzyonên fermî yên Bolîvyayê, duh êvarê li El Alto, bajarekî nêzîkî paytexta Bolîvyayê La Pazê, balafireke Hercules a Hêzên Hewayî yên Bolîvyayê ku pereyên nû yên banka navendî ya welêt vediguhast, di şert û mercên hewayê yên nebaş de li kolaneke qelebalix ket û bû sedema mirina 15 kesan û birîndarbûna herî kêm 30 kesên din.
Pere li kolana qezayê belav bû
Rayedarên herêmî li ser mijarê daxuyanî dan û gotin: “Firokeya leşkerî ji bajarê Santa Cruzê rabûbû û piştî danînê, ji pîsta danînê derket û li kolaneke cîran ket.” Dîmenên li ser medyaya civakî, dîmenên tevlihev nîşan dan ku mirov berê xwe didin cihê qezayê û hewl didin pereyên ku piştî qezayê li erdê belav bûbûn kom bikin.
Her wiha rayedarên herêmî yên li cihê bûyerê hewl didin ku girseyê bi lûleyên avê û gaza rondikrêj belav bikin. Tê payîn ku Banqa Navendî ya Bolîvyayê li ser mijarê daxuyaniyekê bide rojnamevanan.
Balafirgeh ji ber qezayê bi awayekî demkî hat girtin
Di daxuyaniya ku ji aliyê şîrketa hewayî ya neteweyîya Boliviana de Aviación ve hat weşandin de hat aşkerakirin ku Balafirgeha Navneteweyî ya El Alto piştî qezayê bi awayekî demkî hatiye girtin û balafira tevlî qezayê bûye ne ya fîloya wan e.
Dîmenên di medyaya herêmî de hatin weşandin nîşan dan ku, ji bilî balafirê, gelek wesayîtên li ser kolana ku qeza lê qewimî jî bi giranî zirar dîtine.
