Li navçeya Hezroyê ya Amedê pîrozbahiya Newrozê bi beşdarîya gelek kesan bi coş hate lidarxistin. Parlamenter Adalet Kaya di pîrozbahiyê de axivî û got ku ew dixwazin ev Newroz bibe wesîleya azadiya Abdullah Ocalan û yekîtiya Kurdan.
Li navçeya Hezroyê ya Amed pîrozbahiya Newrozê hate lidarxistin. Parlamentera DEM Partiyê ya Amedê Adalet Kaya û Hevserokê DEM Partiya Amedê Abbas Şahîn, nûnerên saziyên sivil û gelek welatiyên Hezroyê beşdarî pîrozbahiyê bûn. Li qada pîrozbahiyê agirê Newrozê hate pêxistin û welatiyan govend gerand. Pîrozbahî coşa gel berdewam kir.
‘Newroz îradeya gel e’
Di pîrozbahiyê de parlamentera DEM Partiyê Adalet Kaya axivî û diyar kir ku Newroz ji bo gelê Kurd ne tenê cejnek e, lê sembola berxwedan û îradeya gel e û wiha got: “Newroz ji bo me ne tenê cejnek e; ew vîna gel e, îradeya gel e. Ji bo azadî û aştiyê berxwedaniyeke mezin e. Gelê Kurd bi hezar salan e li derdora agirê Newrozê dicive; ji bo azadiyê, ji bo aştiyeke bi rûmet û ji bo maf û nasnameya xwe.”
‘Divê azadiya fizîkî ya birêz Ocalan pêk were’
Adalet Kaya di berdewamiya axafina xwe de anî ziman ku îsal Newroz bi hêvî û daxwaza azadiyê tê pîrozkirin û got: “Em îsal Newroza Azadiyê pîroz dikin. Bicihanîna azadiya fîzîkî ya birêz Abdullah Ocalan tê wateya avakirina jiyaneke hevpar a ku gel bikarin bi ziman, çand û nasnameya xwe re bi hev re bijîn.”
‘Bila agirê Newrozê rêya me ronî bike’
Adalet Kaya da zanîn ku agirê Newrozê sembola hêvî û azadiyê ye û ev Newroz dikare bibe pêngava jiyaneke bêşîdet û wekhev ji bo gelên herêmê û got: “Bila agirê Newroz3e rêya me ronî bike.”
Piştî axaftinan gel coşek zêde li dora agirê Newrozê govend gerand û dirûşm berz kirin. Paşê pîrozbahî bi dawî bû.
