Meclisa Bajar a Hesekê bi beşdariya nûnerên partiyên siyasî, rêxistinên civakû welatiyan agirê Newrozê pêxistin. Li bajar heta 21ê Adarê dê pîrozbahiyên Newrozê bidomin. Li Helebê jî amadekariyên pîrozbahiya 21ê Adarê pêk tê, destpêkirin. Rêveberiya Dibistanan a Qomişloyê û TEV-DEMê jî bi pêxistina agir starta pîrozbahiyên Newrozê dan.
Meclisa Bajarê Hesekê li Hesekê Newroz hate pîrozkirin. Endamên Meclisê, nûnerên partiyên siyasî û rêxistinên civakî û gelek welatî tev li pîrozbahiyê bûn. Rayedarên Hikûmeta Demkî jî tev li pîrozbahiyê bûn. Pîrozbahiyê bi rêzgirtinê dest pê kir û piştre Hevserokê Meclisa Bajêr Farûq Tozo axivî. Tozo diyar kir ku Newroz destpêkek nû ya jiyanê ye û wiha got: “Newroz ji nûve vejîna jiyanê û bi dawîkirina neheqiyê ye.” Tozo bal kişand ser girîngiya Newrozê ya dîrokî ji bo gelê Kurd û têkoşîna berdewam a ji bo domandina agirê Newrozê.
Tozo diyar kir ku pîrozkirina Newrozê tê wateya xurtkirina nirxên azadî û nûjenkirinê û girêdana wan a bi nasnameya wan a çandî û yekitiya civakî re nîşan dide. Piştî axaftinê agirê Newrozê hate pêxistin. Pîrozbahiyên Newrozê li bajar dê heta 21ê Adarê dewam bikin.
Li Helebê amadekariyên Newrozê
Kurd û dostên wan ên li Helebê jî amadekariyên pîrozkirina Newrozê dikin. Komîteya Amadekar dest bi amadekirina komên hunerî yên dê di Newrozê de derkevin ser dikê, kir. Pîrozbahiya mezin dê 21ê Adarê saet di 10.00an de li Parka Zarokên Şehîdan a li herêma Şeqîf a li kêleka taxa Şêxmeqsûd, pêk bê. Komîteya Amadekar vexwendnameyên beşdarbûna çalakiyên hunerî, çandî, civakî û gelêrî yên têkildarî Newrozê belav kirin.
Li Qamişloyê starta Newrozê hate dayîn
Rêveberiya Dibistanan a Bajarê Qamişloyê, bi boneya nêzîkbûna 21ê Adarê, çalakiyek li dar xist û agirê Newroz dada. Mamoste û malbatên Şehîdan bi cil û bergên xwe yên Kurdewarî beşdarî çalakiyê bûn. Cihê çalakiyê jî bi al û rengên Kurdî hate xemilandin. Hevserokê Meclisa Malbatên Şehîdan a Bajarê Qamişloyê Ubeyd Etê berî agir pêbikeve axivî û bal kişand ser berxwedana gelê Kurd û girîngiya Newrozê.
TEV-DEMê li dor agir govend gerand
Piştre meşaleya Newrozê hate pêxistin û li ber stranên şoreşgerî û gelêrî yên Kurdî govend hate gerandin. Endamên Tevgera Civaka Demokratîk (TEV-DEM) jî li pêşiya avahiya xwe ya li bajarê Qamişloyê agirê Newrozê pêxistin û li dora agir govend gerandin.
