Ji 2013an heta niha di êrîş û sûîkastên ji aliyê Dewleta Tirk ve pêk hatin de, herî kêm 15 jinên kurd ên siyasetmedar, rojnameger, akademîsyen û dîplomat hatin kuştin.
Artêş û îstîxbarata Tirkiyeyê, di êrîş û sûîkastên salên dawî de herî zêde jinên kurd ên pêşeng dike hedef. Li gorî daneyan di 11 salên dawî de 15 jinên kurd ên rojnameger, akademîsyen, siyasetmedar, dîplomat û rêveber hatin kuştin. Li gorî daneyên li ber dest jinên hatin kuştin nûnertiya civak, siyaset û çapemeniyê dikin û pêşeng in. Li gorî daneyên heyî jinên hatin kuştin wina ne:
* 9ê çileya 2013an: Siyasetmedarên jin Sakîne Cansiz (Sara), Fîdan Dogan (Rojbîn) û Leyla Şaylemez (Rohanî) li Buroya Enformasyonê ya Kurdistanê ya li Parîsê hatin kuştin. Endamê MÎTê Omer Guney ku wekî kujer dehat zanîn piştî hat girtin, li girtîgehê kuştî hat dîtin.
* 4ê çileya 2016an: Li navçeya Silopiyayê ya Şirnexê di navbera salên 2015 û 2016’an de di qedexeyên derketina derve hatibûn îlankirin. Di 4ê Çileya 2016an de endama Meclisa Partiya Herêmên Demokratîk (DBP) Sêvê Demîr, Hevseroka Meclisa Gel ya Silopiyayê Pakize Nayir û Endama Kongreya Jinên Azad (KJA) Fatma Ûyar di êrîşa polîsan de hatin kuştin.
* 3ê Adara 2017an: Rojnamevan Nûjiyan Erhan di êrîşa hêzên PDKê ya li Şengalê de birîndar bû û di 22yê Adara 2017an de jiyana xwe ji dest da.
* 10ê nîsana 2018an: Endama Partiya Sûriya Pêşerojê Nadiye El Xeşan di êrîşa dewletê de hat kuştin.
* 12ê cotmeha 2019an: Hevseroka Partiya Sûriya Pêşerojê Hevrîn Xelef li gel ajokarê erebeya xwe Ferhad Remadan, ji aliyê komên girêdayî Dewleta Tirk hat kuştin.
* 4ê Cotmeha 2022an: Rojnameger û akademîsyen Nagîhan Akarsel di êrişeke çekdarî ya MÎTê de li bajarê Silêmaniyê jiyana xwe ji dest da.
* 23ê Kanûna 2022an: Endama Konseya Rêveber a KCKê Evîn Goyî, li gel 2 hunermendên kurd li paytexta Fransayê Parîsê di encama êrişekê de jiyana xwe ji dest da.
* 23ê Tebaxa 2024an: Rojnamegerên jin ên çapemeniya azad Gulistan Tara û Hêro Behadîn ku di encama êrişa balafira bêmirov a dewleta Tirk de li sînorê navçeya Seyîdsadiq ya Silêmaniyê jiyana xwe ji dest dan.
* 19ê Kanûna 2024an: Balafira şer SÎHA ya Tirk li ser rêya Bajarê Sirinê û Bendava Tişrînê de êrîşî maşîneya rojnameger Cîhan Bîlgîn û Nazim Daştan kirin. Di êrîşê de Cîhan Bîlgîn û Nazim Daştan jiyana xwe ji dest dan.
* 18ê çileya 2025an: Endama Meclisa giştî ya PYDê û Hevseroka Nivîsgeha PYDê ya Qamişloyê Menîce Haco Heyder di êrîşa SÎHA ya li dijî mertalên zindî ya li bendava Tişrînê jiyana xwe ji dest da.
