Li Kobaniyê û Til Temir bi boneya şermezarkirina dagirkeriya dewleta Tirk meş hate li darxistin û hate xwestin ku Tirkiye demildest destê xwe ji Efrînê bikişîne.
Di 8emîn salvegera dagirkirina Efrînê ya ji hêla dewleta Tirk ve li Til Temîr û Kobaniyê meş û daxuyanî hatin lidarxistin. Meclisa Bajar a Til Temir bi boneya şermezarkirina dagirkeriya dewleta Tirk li Parka Meclisa Malbatên Şehîdan daxuyaniyek da çapemeniyê. Şêniyên bajêr û nûnerên rêxistinên civaka sivîl û partiyên siyasî tev li daxuyaniyê bûn. Daxuyanî ji hêla Hevserokê Meclisa Bajêr Xalid El Xelef ve hate dayîn. Xelef dewamkirina dagirkeriya dewleta Tirk a li ser Efrînê şermezar kir û bang li civata navneteweyî û rêxistinên mafên mirovan kir ku berpirsiyariyên xwe pêk bînin û vegera ewle û birûmet ji bo koçberan misoger bikin. El Xelef destnîşan kir ku ji ber dagirkirinê hîn jî bi hezaran koçberên Efrînê di nav şert û mercên dijwar de dijîn. El Xelef diyar kir ku binpêkirinên li Efrînê, binpêkirinên aşkera yên qanûn û peymanên navneteweyî ne.
Di daxuyaniyê de bang li civata navneteweyî û rêxistinên mafên mirovan hate kirin ku berpirsyariyên xwe yên yasayî û mirovî bigirin ser xwe û ji bo vegera ewle û birûmet a koçberan bixebitin.
Li Kobaniyê meş: Divê Tirkiye dagirkeriyê bi dawî bike
Bi boneya 8emîn salvegera dagirkeriyê bi sedan şêniyên bajarê Kobanê û koçberên Efrînê yên ku li Kobanê dijîn, daketin qadan. Girseya gel ji Qada Jina Azad li hev kom bû û heta Qada Aştiyê meşiya. Di meşê de şaxên darên zeytûnê û wêneyên Rêberê Gelê Kurd Abdullah Ocalan û alên kesk, sor û zer hatin hildan û dirûşmeya, “Bijî berxwedana Efrînê” hate berzkirin. Li Qada Aştiyê deqeyekê rêz hat girtin û dûre jî li ser navê gelê Kobanê hevserokê Desteya Jîngehê ya Kobanê Arif Balî axivî û îşaret bir ser vegera xelkê Efrînê kir. Balî wiha axivî: “Beriya 8 salan dewleta Tirk a dagirker bi balafiran dest bi êrişa ser gelê me yê Efrînê kir, li beramberî wê jî qehremanî û fedekariya gelê me, bi hêza parastinê 58 rojan li beramberî artêşeke NATO’yê û li beramberî balafiran berxwedaneke bêhempa kir. Gelê Efrînê jî li Bakur û Rojhilatê Sûriyeyê belav bû. Êdî gel dixwaze vegere ser mal û milkên xwe. Bi fikra Rêber Apo ya entegrasyona demokratîk re dê hêviya vegera li Efrînê êdî bibe rastî.”
