Li gorî çapemeniya Îsraîlê, Îranê ji bo bidawîkirina şer 6 şertên xwe diyar kir. Hat diyarkirin ku şertên Îranê dûrî şertên DYAyê ne.
Li gorî televîzyona Channel 12 a li Îsraîlê weşanê dike, rêveberiya Tehranê ji bo bidawîkirina şer 6 şertên bingehîn danîne.
Ev şert jî bi vî rengî ne: Kontrola li ser Tengava Hurmizê û wergirtina bacê ji bo derbasbûnê, garantî bê dayîn ku jinûve şer destpê neke, êrişên Îsraîlê yên li ser Hizbullahê bêne rawestandin, hemû cezayên li ser Îranê bi temamî bêne rakirin, bernameya mûşekên balîstîk bêyî astengiyekê dewam bike û ji bo zirarên ji ber şer tazmînat bêne dayîn.
Şertên ku Dewletên Yekbûyî yên Amerîkayê (DYA) beriya niha pêşkêş kiribûn û daxwazên Îranê dûrî hev in.
Rêveberiya Washingtonê bi taybetî van daxwazan ji Îranê dike: Ûranyûma dewlemendkirî ya li ber destê xwe radest bike, hin navendên nukleerê ji hev bêne xistin, piştgiriya bi komên hevalbend ên wekî Hizbûllahê re bê rawestandin û kapasîteya mûşekan bê sînordarkirin.
