Îbrahîm Aksoy piştî 30 salan di girtîgehê derket, diyar kir ku heta ku Rêberê Gelê Kurd Abdullah Ocalan û tevahî girtî azad nebin ew jî azad nabin û got: “Çi bikeve ser milên me em ê bikin.”
Îbrahîm Aksoy di sala 1996an de hat girtin û piştî 30 salan ji Girtîgeha Hejmar 1 a Tekîrdagê hate berdan. Îbrahîm Aksoy ji aliyê Komeleya Alîkarî û Piştevaniyê ya bi Malbatên Girtî û Hikumxwaran re ya Marmarayê (MATUHAYDER) û malbata xwe bi kulîlkan hate pêşwazîkirin.
Îbrahîm Aksoy li ber girtîgehê axivî û diyar kir ku ew hatiye berdan lê dilê wî di girtîgehê de ye û got: “Heta ku di serî de Rêberê Gelê Kurd Serokê me Abdullah Ocalan û tevahî hevalên girtî azad nebin em jî azad nabin. Azadiya Serok azadiyê jinê ye, azadiya jinê jî azadiya civakê ye. Kengî Serok azad bû dê civaka me jî azad bibe. Çi bikeve ser milên me em ê bikin.”
