Kongreya Star li bajarê Çilaxayê bi jinan re civiya û daxuyand ku deskeftiyên jinan û YPJ xeta sor in. Kongra Star ragihand ku ji bo YPJ qanûnî were naskirin wê dest bi pêngavê bikin.
Li bajarê Çilaxa endamên Kongra Star ên Çilaxa bi jinan re civiyan. Di civînê de rola rola Kongreya Star û tevgerên jin li Sûriyeyê û di destûrê Sûriyeyê de misogerkirina mafên jinan nîqaş kirin.
Civîn li hola civînan a Partiya Yekitiya Demokratîk (PYD) hat lidarxistin. Di destpêka civînê de nirxandin û nameyên Rêberê Gelê Kurd Abdullah Ocalan ji bo jinan ji aliyê Rêveberiya Komîteya Perwerde û Fêrkirinê ya Çilaxa Henîfa Silêman ve hat xwendin.
Piştî wê Rêveberiya Kongra Star a Çilaxa Hacer Abdullah axivî. Hacer di nava axaftinên xwe de bal kişand ser têkoşîna jinê ya ji dîrokê heyanî roja îro nirxand û got ku jinan di şoreşa Rojava de xwe û civak bi rêxistin kir, gelek bedel dan da ku îrade û rûmeta xwe biparêze û hebûna xwe diyar bike.
Her wiha Hacer li ser têkoşîna Kongreya Star axivî û got: “Kongra Star ji hemû aliyan ve têkoşîn kir, berê jinan da siyasetê û bûn xwedî îrade. Jin ji hemû aliyan ve bûye xwedî nasname.”
Ji bo êrişên dawiyê li ser Herêma Bakur û Rojhilatê Sûriyeyê Hacer wiha got: “Hikûmeta demkî ya Sûriyeyê di van êrîşên dawiyê de êrişî jinan kir. Komên girêdayî hikûmeta demkî xwestin ku desdirêjî deskeftiyên jinan bikin û bi ti awayî jinan qebûl nakin. Di vê pêvajoya lihevkirin û entegrasyonê de berpirsyartiyeke mezin ketiye ser milê jinan. Me dest bi pêvajoya têkoşîna siyasî û qanûnî kiriye. Tevger û saziyên jinan di vê pêvajoyê de divê nava civakê û komînan de bin û xwe bi rêxistin bikin. Deskeftiyên jinan û Yekîneyên Parastin Jin (YPJ) xeta sor in. Em ê têkoşîna xwe bidomînin, di vê pêvajoyê de li ser asta Rojava em ê li komînan komîteyên jin ava bikin.”
Hacer agahî da ku ji bo YPJ qanûnî were naskirin wê dest bi pêngavê bikin û di çarçoveya pêngavê de çalakiyan organîze bikin.
Piştî ku nirxandina Hacer Abdullah bi dawî bû, jinan nêrînên xwe anîn ziman û got divê di pêvajoyê de wê jin pêşengiya têkoşîna siyasî û qanûnî bikin.
