Rêveberiya Navendî ya DEM Partiyê salvegera 10emîn a rizgarkirina Kobanê pîroz kir.
Desteya Rêveberiya Navendî ya DEM Partiyê bi boneya salvegera 10emîn a rizgarkirina Kobanê daxuyaniyek nivîskî belqv kir.
Daxuyaniya bi sernavê “Serfiraziya Kobanîyê serfiraziya rûmeta mirovahiyê ye, pîroz be” wiha ye:
“Îro 10emîn salvegera agirê mezin ê azadiyê ye ku li Rojhilata Navîn hat pêxistin, salvegera têkoşîna rûmeta mirovahiyê ye, salvegera wêrekiya ku di pêşengiya jinan de li dijî tarîtiyê bilind bû, yanî salvegera Serfiraziya Kobanîyê li dijî çeteyên DAIŞê ye. Li hemû mirovahiyê pîroz be.
Çeteyên DAIŞê yên ku ji aliyê hêzên cîhanî û herêmî ve hatin xurtkirin û axa Rojava dagir kirin, di Cotmeha 2014an de dest bi êrişan kir. DAIŞa ku bi cebilxane û çekên giran ên weke tank û topên ku bi taybetî ji Mûsilê bi dest xistibû, dest bi êrişa li ser Bakur û Rojhilatê Sûriyeyê kir, ji Rojhilata Navîn dest pê kir xeyala xwe ya tarî û dijmirovî li hemû cîhanê belav bike. DAIŞa ku bi hovîtiya xwe her der bê berxwedan bi dest xist û dewletan jî nekarîn li hemberî wê bisekinin, li Rojava, li Kobanîyê têk çû. Ev serfiraziya ku bi têkoşîna jinan hat bidestxistin mohra xwe li dîroka berxwedanê kir. Gelê Kurd û şoreşgerên enternasyonalîst, bi biryar bûn ku ax, can û rûmeta xwe biparêzin û wan ji bo azadiyê; bi bawerî û fedekariyeke mezin li Kobanîyê DAIŞ têk bir. Tevî hemû serweriya xwe ya teknîkî û hejmarî û piştevaniya hêzên cîhanî û herêmî jî, DAIŞ ji aliyê zarokên bi rûmet ên bajarekî û hevalên wan ve hat şikandin. Berxwedana Kobanîyê a nepêkan bi dest xist, a nebûyî pêk anî. Bi vê serketinê re Kobanî bû paytexta wijdanê.Îradeya azadiyê ya ku tu carî ji holê ranabe pêşkêşî gelên cîhanê kir.
Îro jî yên ku nikarin vê serketinê hezm bikin hene û hewl didin tiştê ku DAIŞê nekarî bi dest bixe, bidomînin. Her êrişa îro, ji bo tunekirina modela jiyan û rêveberiyê ya Bakur û Rojhilatê Sûriyeyê, encama vê hewlê ye. Êrişên li dijî Tişrînê û ji wir jî ber bi Kobanîyê ve berdewama êrişên DAIŞê ye. Lê berxwedan û ruhê Kobanîyê ruhê wekhevî, azadî û jiyana hevbeş a li vê xakê ye. Dijminatiya li hemberî Kobanîyê ne tenê li dijî gelê Kurd, li dijî hemû gelan e ku dixwazin bi hev re, wekhev û azad bijîn.
Bi vê boneyê em careke din Serfiraziya Kobanîyê pîroz dikin. Felsefe û baweriya ku Kobanîyê afirand, dê rêberiya mirovahiyê bidomîne. Heta ku hemû gelên Rojhilata Navîn azad bibin gel dê vê rêyê bişopînin.”
