Wan – Hunera destan ya bi destê jinan derdikeve holê, di nava civakê de hê jî didome. Li herêma Serhedê gelek jin bi çêkirina qelemçe, etemîn, destmal, gore, mêzer û hwd. çanda destkarî diparêzin.
Li bajarê Wanê, jinên Kurd bi hunera xwe ya destan ku ji kevneşopiyên berê tê, hê jî berheman diafirînin û dixwazin çanda xwe zindî bihêlin. Ev huner ku zêdetir di qelemçeyê, derziyê û çêkirina goran û mêzeran de xuya dibe, ne tenê çavkaniya pere ye, lê her wiha beşek girîng ji nasnameya çandî ye. Ev berhemên bi destê jinan derdikevin, bi sedsalan e di çanda Kurdan de cihekî mezin û girîng digire.
‘Ji bo çanda Kurdî çi ji destê jinan hatibe kiriye’
Cahîde Gezîcî ku yek ji van jinên berhemdar e, got ku ev 40 sal in ew bi hunera destan ve eleqedar dibe û diyar kir ku ew ji heft salî ya xwe heta niha bi vê çandê ve mijûl e. Cahîde Gezîcî ku behsa berhemên çêdike kir, wiha got: “Ez bi derziyê etemîn, qelemçe û qurumçe, morî, desmal, gore û hwd. Çêdikim. Nêzî 40 sal in em van tiştan çêdikin, ji bo vê çandê çi ji destê me jinan hatibe me kiriye. Em van tiştan çêdikin, li xwe dikin, difiroşin, didin kesên hewcedar û hewcedariyên xwe jî pêk tînin. Em dixwazin çanda me winda nebe, çi destê me jina de tê em dikin.”
‘Em dixwazin çanda me berdewam bike’
Cahîde Gezîcî anî ziman ku ew bi tevnê mêzeran jî çêdike û wiha axivî: “Berê me pez xweyî dikir, me potikê gûzan dermanên rengûreng çêdikir û me ev derman li hiriya pez dixist. Me ev hirî dikir ben û me dest bi mêzer û goran dikir. Ev pêvajo hemû bi destan dihatin kirin. Lewma, em dixwazin çanda me her berdevam bike ku zaroken me jî hîn bibin û vê çandê pêk bînin.”
