Hevserokê Giştî yê DBPê Keskîn Bayindir di kampanyaya “Ji Rojava re statu, ji bo gelan azadî” de axivî û got: “Divê her kes xwedî li Rojava derkeve. Çareseriya pirsgirêka Kurd, di naskirina statuya Rojava re derbas dibe.”
Bi daxwaza naskirina statuya Rêveberiya Xweser a Bakur û Rojhilatê Sûriyeyê, li Amedê deklarasyona “Ji Rojava re statu, ji bo gelan azadî” hate weşandin. Nûnerên partiyên siyasî û rêxistinên civaka sivîl di daxuyaniyê de axivîn.
Hevserokê Giştî yê Partiya Herêmên Demokratîk (DBP) Keskîn Bayindir ewilî axivî û destpêkê bal kişand ser salvegera rizgarkirina Kobanê: “Ev roja taybet li tevahiya gelê Kurd pîroz be. Gelê Kurd mîna azadiya Kobanê, divê serkeftinên din jî bi dest bixe. Dirûşma me; ji Rojava re statu, ji bo gelan azadî ye.”
‘Divê her kes xwedî li moedela Rojava derkeve’
Keskîn Bayindir diyar kir ku Rojava dikare qedera Sûriyeyê diyar bike û got: “Netewedewlet li seranserî cîhanê di nava lêgerînekê de ne. Em dizanin ku modêla ku hemû gel bi hev re, azad bijîn modêla Rojava ye. Lewma em dibêjin divê teqez her kes xwedî li modêla Rojava derkeve û xwedî li statûya Rojava derkeve. Tevî hemû zehmetiyan jî modêla Rojava ev 13 sal in xwe li ser pêyan digire. Divê her kes biparêze û li seranserî Rojhilata Navîn bikeve meriyetê.”
‘Dijminatiya Rojava nekin’
Keskîn Bayindir got ku xelkê sivîl ê li Tişrînê ku statû û xaka xwe diparêze bi awayekî hovane tê kuştin û ev yek anî ziman: “Dixwazin berxwedana gel têk bibin. Divê Tirkiye dijminatiyê li modêl û statûya Rojava neke. Ev modêl ji bo tu aliyan gef nîne. Weke partiyên siyasî, sazî dezgehan em ji bo naskirina statuya Rojava bixebitin. Divê êrişên ser Rojava tavilê bên sekinandin. Tekane rêya naskirina statûya Rojava, çarserkirina pirsgirêka Kurd e. Divê dewleta Tirkiyeyê û AKP vê înkar neke. Banga me ji bo AKPê ye; dijminatiya modela Rojava nekin. Birêz Ocalan di hevdîtinê got; ‘Pêvajoya em tê de ne firsendeke dîrokî ye’. Ji bo çareseriya pirsgirêka Kurd ev girîng e. Çareseriya pirsgirêka Kurd, ji naskirina statûya Rojava derbas dibe. Em êdi rojên pêş de ji bo naskirina statûya Rojava bixebitin.”
‘Êrişên li ser Rojava nayên pejirandin’
Li ser navê Kongreya Îslama Demokratîk (DÎK) jî Mehmet Emîn Ay axivî û geşedanên heyî şiband Kerbelayê û wiha got: “Şerê Yezîd û Huseyniyan li ber Çemê Firatê didome. Yêzîdên serdemê êrişî gelan dikin. Li rexa din jî berxwedana gel û baweriyan a bi pêşengtiya Kurdan heye. Divê ev êriş bên bidawîkirin. Çawa ku DAIŞ li Kobanê hate têkbirin, kesên van êrişan dikin jî dê bên têkbirin.”
‘Gelê Kurd ne sûcdar e, sûcdar diyar in’
Serokê Giştî yê Partiya Însan û Azadiyê (PÎA) Ahmet Kaya jî xwest pirsgirêk li ser maseyê bên çareserkirin û got: “Pirsgirêk bi zordestiyê çareser nabein. Ji bo çareseriya pirsgirêka Kurd hevdîtin hene, tişta pêwîst bikin. Gelê Kurd sûcdar nîn e. Sûcdar diyar in.”
‘Kes nikare berxwedana Kurdan têk bibe’
Cîgirê Serokê Partiya Komunist a Kurdistanê (KKP) Mûrat Daniş jî got ku di dîrokê de Kurdan tu cara serî li ber dijminên xwe netewandine. Mûrat Daniş anî ziman ku nêzikatiya li dijî Rojava çi be dê ya li dijî Bakur jî ew be û wiha got: “Divê gelê Kurd yekitiya xwe ava bike. Li hemberî Kurdên aştiya xwe ya navxweyî pêk anî û yekitiya xwe ya neteweyî ava kirî, tu kes nikare li ber xwe bide. Roja wê ye ku her kes li gorî feraseta yekitiya neteweyî tevbigere.”
‘Statuya Rojava dê bibe azadiya Kurdan’
Endamê MYKa Partiya Kedê (EMEP) Umut Yegen jî destnîşan kir ku naskirina statûya Rojava dê her wiha bibe azadiya Kurdên kedkar. Yegen ji bo naskirina statuya Rojava û pêşîlêgirtina êrişan, banga têkoşînê kir.
