Bi pêşengiya DBP û DEM Partiyê yên Sêrtê li navçeya Ziyaretê ya Sêrtê bi ciwanan re bernameya seyrangehê li dar xistin.
Bi pêşengiya Partiya Herêmên Demokratîk (DBP) û Partiya Wekhevî Demokrasiyê ya Gelan (DEM Partiyê) yên Sêrtê li navçeya Ziyaretê ya Sêrtê bi ciwanan re bernameya seyrangehê li dar xistin. Gelek rêveber û endamên DEM Partî û DBPê yên Sêrtê û navçeyên wê, hevşaredarên Misircê û yên navendê jî di nav de gelek nunerên saziyên sivîl beşdar bûn. Girseyê pêşî ji bo kesên ku di têkoşîna azadiya Kurdistanê de jiyana xwe ji dest dane deqeyek rêzgirtin.
‘Pêvajo gelek hêdî dimeşe’
Aktîvîsta TJAyê Çîmen Fîdan ku tev li bernameya seyrangehê ya ciwanan bû wiha axivî: “Dema ku em îro li pêvajoyê dinerin pêvajo gelek hêdî dimeşe. Tevî vê yekê jî ciwanên Kurd, jin û gelek hevalên me li qadan xebatên xwe dikin. Û hemû bi hev re di rojên zehmet de, di nava xwezayê de dîsa jî tên cem hev û xebatên hevpar dikin û hêzeke mezin dide mirov. Pir hindik em hemû dîroka Kurdistanê dizanin. Hertim têkoşîna ku li ser erdnîgariya Kurdistanê hatiye dayîn, gelek bedelên mezin jî pêre bûne. Her wiha li gelek deverên çiyayên me, bajarên me û li gundên me hemû li me tên talankirin, qedexekirin û dagirkirin. Mixabin weke jin hertim li ser me qetlîam tên kirin û em tim di nava êş û janan de dijîn. Gelek rêxistinên me di dîroka Kurdistanê de hatine avakirin, piraniya wan jî demek kin li ber xwe dane.”
Seyrangeh bi stran û gerandina govendê bi dawî bû.
