Hat ragihandin ku Serokê DYAyê Donald Trump wê der barê geşedanên dawî yên li Îranê de civîneke krîzê pêk bîne. Di civînê de wê vekirina Tengava Hurmuzê û xitimîna danûstandinên agirbestê bên nîqaşkirin. Wezîrê Karên Derve yê Îranê jî daxwazên DYAyê wekî sedema xitimîna pêvajoyê nîşan dan.
Serokê Dewletên Yekbûyî yên Amerîkayê (DYA) Donald Trump, wê roja Duşemê bi rojeva Îranê civîneke krîzê li dar bixe. Li gorî nûçeyên ku di çapemeniya Amerîkayê de cih girtin, di civînê de wê mijarên wekî xitimîna hevdîtinên agirbestê û ji nû ve vekirina Tengava Hurmuzê ya ji bo trafîka deryayî, bi berfirehî werin nirxandin.
Vebijêrkên şer dê bên nirxandin
Nûçegihanê Axiosê Barak Ravid diyar kir ku Trump wê bi tîma xwe ya ewlehiya neteweyî û siyaseta derve re rûne. Ravid destnîşan kir ku ev hevdîtin wê zêdetir li ser asêbûna di muzakereyên bi Îranê re û vebijarkên îhtîmal ên têkildarî pêvajoya şer hûr bibe.
DYA bi encamdayîna dorpêçê hêvî ye
Kanala ABC Newsê jî nûçeya xwe spart du rayedarên DYAyî yên ku agahiya wan ji amadekariyan heye û da zanîn ku baweriya rêveberiya Washingtonê ya bi bandora dorpêça deryayî ya li ser Îranê zêdetir bûye. Lê belê hat diyarkirin ku li hemberî vê yekê, gumanên ku muzakereyên heyî wê encamekê bi xwe re bînin jî zêde bûne.
Îranê pêşniyareke nû şand
Li aliyê din, hat îdiakirin ku Îranê pêşniyareke nû gihandiye DYAyê. Li gorî vê yekê rêveberiya Tehranê pêşniyar kiriye ku di serî de Tengava Hurmuzê ji nû ve bê vekirin û şer bi dawî bibe, muzakereyên nukleerî jî di qonaxeke pêşerojê de bên nirxandin. Lê tê destnîşankirin ku ev pêşniyar li gorî aliyê DYAyê di bin “xetên wan ên sor” de maye û nehatiye qebûlkirin.
Tehran: Berpirsyarê bêencammayînê DYA ye
Ligel van geşedanan, Wezîrê Karên Derve yê Îranê Abbas Erakçî, ji ber bêencammayîna hevdîtinên li Pakistanê, DYA wekî berpirsyar nîşan da. Erakçî parast ku “daxwazên zêde” yên DYAyê pêvajoya muzakereyê xitimandiye û destnîşan kir ku ewlehiya li Tengava Hurmuzê xwedî girîngiyeke cîhanî ye.
